साळेगाव येथे विना परवाना सुरू असलेले आरोग्य शिबिर वैद्यकीय अधिकाऱ्यांनी बंद केले

आरोग्य तपासणी करणाऱ्या व्यक्तीकडे कोणतीही कागदपत्रे किंवा प्रमापत्रे आढळून आली नाहीत

लोकार्थ प्रतिनिधी गौतम बचुटे

केज :- केज तालुक्यात बोगस डॉक्टरांवर कारवाई झालेली असताना पुन्हा एका संस्थेने आरोग्य विभागाच्या परवानगी शिवाय एका गावात रुग्णांची तपासणी सुरू असल्याची माहिती मिळताच आरोग्य विभागाने तात्काळ हजर होऊन ते शिबिर बंद केले. त्यांच्याकडे वैद्यकीय सेवा किंवा तपासणी बाबत कोणतेही कागद पत्रे सादर करू शकले नाहीत मात्र अद्याप त्यांच्यावर कारवाई झालेली नाही.

दि. ३१ ऑक्टोबर रोजी बीड जिल्ह्यातील साळेगाव ता. केज येथे हनुमान मंदिरात, उम्मीद एक नयी किरण आयुर्वेद चॅरिटेबल ट्रस्ट आणि स्पर्श हेल्थ केअर यांच्या संयुक्त विद्यमाने गावात प्रती रुग्ण ५० रु. नोंदणी फी घेऊन अनेक रुग्णांची नोंदणी केली होती. त्या मध्ये अत्याधुनिक ए टी एम डिजीटल मशीनद्वारे संपूर्ण आरोग्य तपासणी शिबिरात तज्ज्ञ डॉक्टर यांच्या मार्फत ईसीजी, स्नायू वस्तुमान, स्पी ओ २, हिमोग्लोबीन,अस्थी, पल्स, रक्तदाब, चयापचय, वय, तापमान, शुगर, फॅट फ्री वेट, हाईट वेट, बॉडी फॅट, शरीरातील पाणी, बी एम.आय, सबकुटनेलस फॅट, कंकाल वस्तुमान, बी एम आर, विस्कारल फॅट अशा सुमारे ४ ते ५ हजार रु. मध्ये होणाऱ्या तपासण्या अवघ्या ५०० रु. मध्ये करण्यात येत होत्या. याची माहिती केज तालुका आरोग्य अधिकारी डॉ. राहुल मुंडे यांनी ग्रामीण आरोग्य केंद्राच्या वैद्यकीय अधिकारी डॉ. शिला कांबळे यांनी अचानक तेथे शिबिर सुरू असल्याचे आढळून आले. त्यांनी त्यांच्याकडे या बाबत परवानगी किंवा त्या बाबत कागदपत्रे व प्रमाण पत्रे यांची मागणी केली असता त्यांच्याकडे कोणतीही परवानगी किंवा प्रमाणपत्रे आढळून आली नाहीत. म्हणून त्यांनी तपासणी बंद केली.

शिबिरात रुग्णतपासणी करीत तथाकथित डॉक्टर आणि तंत्रज्ञ :-
वैद्यकीय अधिकारी डॉ. शिला कांबळे यांनी माहिती घेतली असता तपासणी करीत असलेली महिला ही, सोनिया प्रकाश सैंदाने हिचे शिक्षण बीएचएमएस असल्याचे सांगते मात्र तिच्याकडे रजिस्ट्रेशन प्रमाणपत्र उपलब्ध नाही.

कृष्णा हरिदास मंजुळकर हा त्याचे शिक्षण डीएमएलटी असल्याचे सांगतो परंतु त्याच्याकडे पदविका प्रमाणपत्र नाही.

पडताळणी करून कारवाई करणार :- तालुका आरोग्य अधिकारी डॉ. राहुल मुंडे यांच्याशी संपर्क साधला असता त्यांनी या प्रकरणी वरिष्ठांशी संपर्क साधून व अधिक चौकशी करून कारवाई करणार असल्याचे सांगितले

जिल्हा आरोग्य अधिकाऱ्यांचा संपर्क होऊ शकला नाही :- या आरोग्य शिबिर आणि बोगस डॉक्टरांच्या कारवाई संदर्भात प्रकरणी जिल्हा वैद्यकीय अधिकारी डॉ. उल्हास गंडाळ यांच्याशी संपर्क साधण्याचा प्रयत्न केला असता त्यांनी प्रतिसाद दिला नाही.