चिराग शाह तलावाच्या कामात निष्काळजीपणा; आमदार तानाजी मुटकुळे संतापले

धीम्या गतीमुळे कंत्राटदाराला झाडले; निकृष्ट काम खपवून घेणार नसल्याचा दिला इशारा

लोकार्थ प्रतिनिधी गोपाल सातपुते

हिंगोली : शहरातील प्रसिद्ध व ऐतिहासिक चिराग शाह तलावाच्या सौंदर्यीकरण आणि विकासकामात अत्यंत संथ गती आणि निष्काळजीपणा दिसून येत असल्याने आमदार तानाजी मुटकुळे यांनी संबंधित काम करणाऱ्या एजन्सीवर तीव्र नाराजी व्यक्त केली आहे. गेल्या अनेक दिवसांपासून हे काम रडखडत सुरू असून, “कामातील कोणताही निष्काळजीपणा किंवा नगरचेपणा (निकृष्ट दर्जा) खपवून घेतला जाणार नाही,” असा सज्जड इशारा त्यांनी दिला.
हिंगोली शहरासाठी महत्त्वाच्या मानल्या जाणाऱ्या चिराग शाह तलावाच्या विकासकामाची आज आमदार तानाजी मुटकुळे यांनी प्रत्यक्ष पाहणी केली. तलावाचे काम धीम्या गतीने सुरू असल्याने नागरिकांमधून असंतोष व्यक्त केला जात होता. पाहणीदरम्यान कामातील दिरंगाई पाहून आमदारांनी उपस्थित अधिकाऱ्यांना व ठेकेदाराला चांगलेच धारेवर धरले. हे काम तातडीने गतिमान करून लवकरात लवकर आणि गुणवत्तापूर्ण पद्धतीने पूर्ण करावे, असे सक्त निर्देश त्यांनी संबंधित विभागाच्या अधिकाऱ्यांना दिले.
या पाहणी दौऱ्यावेळी नगरसेवक राजेश गोटे, नगरसेवक हमीद प्यारेवाले, पृथ्वी शिवाजी मुटकुळे यांच्यासह स्थानिक लोकप्रतिनिधी, नागरिक आणि संबंधित विभागाचे अधिकारी उपस्थित होते. तलावाचे काम वेळेत पूर्ण न झाल्यास तीव्र कारवाई करण्याचा इशाराही यावेळी देण्यात आला.