माणुसकीचा दीप उजळवत आमदार प्रशांत बंब यांची आदिवासी कुटुंबांसोबत दिवाळी!

गरजू कुटुंबांना हक्काचा निवारा; फराळ वाटप करून वंचितांच्या चेहऱ्यावर फुलवला आनंद

लोकार्थ प्रतिनिधी विजय बनसोड

गंगापूर : दिवाळी म्हणजे केवळ दिव्यांची रोषणाई आणि आनंदोत्सव नव्हे, तर समाजातील वंचित आणि गरजू घटकांच्या आयुष्यातही आनंदाचा प्रकाश निर्माण करण्याचा सण होय. याच माणुसकीच्या भावनेतून आमदार प्रशांत बन्सीलाल बंब यांनी लासूर स्टेशन परिसरातील आदिवासी कुटुंबांसोबत दिवाळी साजरी करत सामाजिक बांधिलकीचा प्रत्यय दिला.

लासूर स्टेशन येथे रस्त्यावर पोटाची खळगी भरण्यासाठी पादचाऱ्यांकडे मदतीची याचना करणारी तसेच रात्री उघड्यावर वास्तव्य करणारी काही आदिवासी कुटुंबे आमदार प्रशांत बंब यांच्या निदर्शनास आली होती. या कुटुंबांच्या निवाऱ्याचा गंभीर प्रश्न लक्षात घेऊन लासूरगाव रोड परिसरात त्यांच्यासाठी घरांची व्यवस्था करून देण्यात आली. त्यामुळे अनेक कुटुंबांना हक्काचा निवारा मिळण्यास मदत झाली.

दिवाळीच्या निमित्ताने आमदार बंब यांनी या कुटुंबांची भेट घेतली. तसेच परिसरातील झोपड्यांमध्ये वास्तव्यास असलेल्या अन्य आदिवासी कुटुंबांनाही फराळाचे वाटप करून त्यांच्यासोबत दिवाळीचा आनंद साजरा केला. यावेळी त्यांनी कुटुंबीयांशी संवाद साधत त्यांच्या अडचणी, समस्या आणि अपेक्षा जाणून घेतल्या.

हक्काचा निवारा मिळाल्याने आदिवासी कुटुंबांच्या चेहऱ्यावर उमटलेला आनंद आणि समाधान या भेटीचे विशेष वैशिष्ट्य ठरले. समाजातील शेवटच्या घटकापर्यंत मदतीचा हात पोहोचवणे आणि त्यांच्या जीवनात सुरक्षितता व आशेचा किरण निर्माण करणे, हीच खरी सामाजिक बांधिलकी असल्याचा संदेश या उपक्रमातून देण्यात आला.

दुसऱ्यांच्या आयुष्यात आनंदाचा दीप प्रज्वलित करण्यासाठी केवळ संपत्ती नव्हे, तर संवेदनशील मन आणि मदतीची कृती आवश्यक असते. आमदार प्रशांत बंब यांच्या या उपक्रमातून माणुसकीच्या दिवाळीचे दर्शन घडले.