‘अमृतपेठ थेट बाजारपेठ’ दिवाळी प्रदर्शनाचे उपमहापौर राजेश राऊत यांच्या हस्ते उद्घाटन

महिला उद्योजिका व बचत गटांना हक्काचे व्यासपीठ उपलब्ध करून देणे कौतुकास्पद – उपमहापौर राजेश राऊत

लोकार्थ प्रतिनिधी राहुल मुळे

जालना : महाराष्ट्र संशोधन, उन्नती व प्रशिक्षण प्रबोधिनी (अमृत) या महाराष्ट्र शासनाच्या स्वायत्त संस्थेच्या वतीने आयोजित करण्यात आलेल्या ‘अमृतपेठ थेट बाजारपेठ’ दिवाळी प्रदर्शन २०२६ चे उद्घाटन सोमवार, दि. २ नोव्हेंबर रोजी स्वयंवर मंगल कार्यालय, भाग्यनगर, जुना जालना येथे जालना शहर महानगरपालिकेचे उपमहापौर राजेश राऊत यांच्या हस्ते उत्साहात संपन्न झाले.

यावेळी राज्य संघटना समन्वयक तथा अमृतचे राज्य व्यवस्थापक श्री. दीपक जोशी, विभागीय व्यवस्थापक श्री. अमित सामंत, नगरसेवक सिद्धिविनायक मुळे, उद्योजक तथा या कार्यक्रमासाठी सहकार्य करणारे राजेशजी खिस्ते, चंद्रकांतजी कुलकर्णी, माहेश्वरी समाजाचे अध्यक्ष विजय राठी, राजेंद्र राऊत यांच्यासह महिला बचत गटातील मोठ्या संख्येने महिला उपस्थित होत्या.

यावेळी बोलताना उपमहापौर राजेश राऊत म्हणाले की, स्थानिक महिला उद्योजिका, महिला बचत गट आणि लघुउद्योजकांनी तयार केलेल्या वस्तूंना बाजारपेठ उपलब्ध करून देण्याचा अमृत संस्थेचा उपक्रम अत्यंत स्तुत्य आहे. अशा प्रदर्शनांमुळे महिलांच्या आर्थिक सक्षमीकरणाला चालना मिळते आणि त्यांच्या कलागुणांना योग्य व्यासपीठ मिळते.

येत्या काळात जालना शहर महानगरपालिकेच्या महिला व बालकल्याण विभागाच्या वतीने महिला बचत गटांचा मेळावा तसेच त्यांच्या उत्पादनांच्या विक्रीसाठी विशेष उपक्रम आयोजित करण्यात येणार आहे. या उपक्रमामध्ये अमृत संस्थेनेही सहभागी व्हावे. शासनाच्या विविध संस्था आणि संघटनांनी एकत्रितपणे काम केल्यास महिला उद्योजकांना अधिक चांगल्या संधी उपलब्ध होतील, असे आवाहनही त्यांनी केले.

यावेळी उपमहापौर राजेश राऊत यांनी उपस्थित सर्वांना दीपावलीच्या मनःपूर्वक शुभेच्छा दिल्या. येणारे वर्ष सर्वांच्या जीवनात सुख, समृद्धी आणि समाधान घेऊन येवो, अशी सदिच्छा व्यक्त केली. यंदा कमी पावसामुळे दुष्काळाचे सावट निर्माण झाले असून, या परिस्थितीचा सामना करण्याची शक्ती परमेश्वराने सर्वांना द्यावी, अशी प्रार्थनाही त्यांनी केली.

‘जल है तो कल है’ हा संदेश देत येणाऱ्या काळात प्रत्येकाने पाण्याचे महत्त्व ओळखून पाण्याचा काटकसरीने वापर करावा, पाण्याची बचत करावी आणि जलसंवर्धनासाठी आपले योगदान द्यावे, असे आवाहनही उपमहापौर राजेश राऊत यांनी यावेळी केले.