गुन्हेगारी कारवायांना लगाम; उत्तम येटाळे एमपीडीएतून चंद्रपूर कारागृहात

लोकार्थ प्रतिनिधी विजय देऊळगावकर

छत्रपती संभाजीनगर : शहरातील वाढत्या गुन्हेगारी कारवायांमध्ये सहभागी असलेल्या उत्तम बाबासाहेब येटाळे (वय ३४, रा. जयभीमनगर, टाऊन हॉल) याच्याविरुद्ध पोलीस आयुक्त प्रविण पवार यांनी एमपीडीए कायद्यान्वये स्थानबद्धतेचे आदेश जारी केले आहेत. त्यानुसार त्याला चंद्रपूर मध्यवर्ती कारागृहात हलविण्यात आले आहे.
येटाळे याच्याविरुद्ध बेगमपुरा पोलीस ठाण्यात घातक हत्याराने मारहाण, जबरी चोरी, सदोष मनुष्यवधाच्या प्रयत्नासह गर्भातील अर्भकाचा मृत्यू घडवून आणणे, घरात अतिक्रमण, बेकायदेशीर दारू वाहतूक, धमकी देणे, सार्वजनिक उपद्रव निर्माण करणे आदी गंभीर स्वरूपाचे गुन्हे दाखल आहेत. त्याच्याविरुद्ध यापूर्वी प्रतिबंधात्मक कारवाई करूनही त्याच्या गुन्हेगारी कारवाया सुरूच होत्या.
या पार्श्वभूमीवर २६ ऑक्टोबर रोजी पोलीस आयुक्त प्रविण पवार यांनी एमपीडीए कायद्याच्या कलम ३ (१) अन्वये स्थानबद्धतेचे आदेश दिले. ३१ ऑक्टोबर रोजी या आदेशाची अंमलबजावणी करून येटाळे याला चंद्रपूर मध्यवर्ती कारागृहात स्थानबद्ध करण्यात आले.