पैठण डाव्या कालव्याची मुख्य अभियंता सुनंदा जगताप यांच्याकडून पाहणी

पाणी वापर संस्थांच्या समस्या तातडीने सोडविण्याचे निर्देश; प्रत्येक शाखेला कंत्राटी शाखाधिकारी देण्याची मागणी

लोकार्थ प्रतिनिधी अविनाश घोगरे घनसावंगी
जायकवाडी पैठण डाव्या कालव्याच्या कार्यक्षेत्रातील विविध समस्यांची जलसंपदा विभागाच्या मुख्य अभियंता तथा मुख्य प्रशासक सुनंदा जगताप यांनी शनिवारी (दि. २६) पाहणी केली. यावेळी कालव्याच्या देखभाल-दुरुस्तीच्या कामांसह पाणी वापर संस्थांच्या विविध अडचणींबाबत अध्यक्ष, सचिव व संचालकांनी त्यांच्याशी चर्चा करून प्रलंबित प्रश्न तातडीने मार्गी लावण्याची मागणी केली.

यावेळी कार्यकारी अभियंता गणेश हासे, उपअभियंता गोल्डे, सुरेश भांगे, संदीप कुर्ले, पुरुषोत्तम सारडा, शाखाधिकारी नागराज कटकधोंड, सुधाकर दळवी, बाळासाहेब सातपुते, गणेश मुंडे तसेच स्थापत्य अभियांत्रिकी सहायक संकेत पाटील, शीतल मॅडम, जिकरिया पीरजादे, शिवराम चाटे, गणेश मोरे आदी अधिकारी व कर्मचारी उपस्थित होते.

पाहणीदरम्यान पाणी वापर संस्थांच्या अध्यक्ष, सचिव व संचालकांनी कालव्याशी संबंधित विविध समस्या मुख्य अभियंता सुनंदा जगताप यांच्या निदर्शनास आणून दिल्या. पाणी वापर संस्थांच्या कामांची स्थळ पाहणी, आवश्यक त्या कामांचे अंदाजपत्रक तयार करणे तसेच कालव्याशी संबंधित विविध कामांना प्रशासकीय व तांत्रिक गती देण्यासाठी प्रत्येक शाखेला स्वतंत्र शाखाधिकारी उपलब्ध करून देण्याची मागणी यावेळी करण्यात आली.

सध्या शाखाधिकाऱ्यांची कमतरता असल्याने अनेक कामांना विलंब होत असल्याचे पाणी वापर संस्थांच्या पदाधिकाऱ्यांनी निदर्शनास आणून दिले. यामुळे शेतकऱ्यांशी संबंधित कालवा व्यवस्थापन, दुरुस्ती आणि पाणी वितरणाच्या कामांवरही परिणाम होत असल्याचे त्यांनी सांगितले.

या मागणीची दखल घेत मुख्य अभियंता तथा मुख्य प्रशासक सुनंदा जगताप यांनी प्रत्येक शाखेसाठी तातडीने कंत्राटी पद्धतीने शाखाधिकारी उपलब्ध करून देण्याबाबत कार्यकारी अभियंता गणेश हासे यांना निर्देश दिले. त्यामुळे कालव्याच्या देखभाल-दुरुस्तीच्या कामांना तसेच पाणी वापर संस्थांच्या प्रलंबित प्रश्नांना गती मिळण्याची अपेक्षा व्यक्त करण्यात आली.

दरम्यान, डावा कालवा कार्यक्षेत्रातील सर्व पाणी वापर संस्थांच्या अध्यक्ष, सचिव व संचालकांच्या वतीने मुख्य अभियंता सुनंदा जगताप यांच्यासह उपस्थित अधिकारी व कर्मचाऱ्यांचा शेतकऱ्यांनी उत्पादित केलेल्या फळांची टोपली भेट देऊन सत्कार करण्यात आला. पाहणीप्रसंगी डावा कालवा कार्यक्षेत्रातील विविध पाणी वापर संस्थांचे अध्यक्ष, सचिव, संचालक व शेतकरी मोठ्या संख्येने उपस्थित होते.