समृद्धी महामार्गावर भीषण अपघात; पती-पत्नी आणि ७ वर्षांच्या चिमुकल्याचा मृत्यू

लोकार्थ प्रतिनिधी विजय देऊळगावकर छत्रपती संभाजीनगर

लहान भावाच्या लग्नासाठी आई-वडिलांना सरप्राईज देण्यासाठी पुण्याहून जालन्याकडे निघालेल्या कुटुंबावर समृद्धी महामार्गावर काळाने घाला घातला. वेरूळ परिसरात चालकाला डुलकी लागल्याने कारने समोरील ट्रकला पाठीमागून जोरदार धडक दिली. या अपघातात पती प्रतीक रामकिसन जगदाळे (३५), पत्नी श्रेया राजेंद्र पांडे (३२) आणि त्यांचा ७ वर्षांचा मुलगा रुद्रांश यांचा मृत्यू झाला.

शनिवारी (२६ सप्टेंबर) दुपारी १२ वाजेच्या सुमारास चॅनेल क्रमांक ४४९ येथे हा अपघात झाला. प्रतीक हे आयटी अभियंता होते, तर श्रेया पूर्वी खासगी कंपनीत अकाउंटंट म्हणून कार्यरत होत्या. लहान भावाच्या लग्नाची तयारी सुरू असल्याने आई-वडिलांना न सांगता अचानक भेटण्याचा त्यांचा विचार होता. शनिवारी सुट्टी साधून हे कुटुंब पहाटे ६ वाजता कारने जालन्याकडे निघाले होते.

कार (एमएच १२ वायएस १०२८) ट्रक (जीजे २१ वाय ३३६२) वर आदळल्यानंतर पुढील भाग ट्रकखाली घुसला. तिघेही कारमध्ये अडकले होते. मदत पथकाने क्यूआरव्हीच्या सहाय्याने कारचा पत्रा कापून त्यांना बाहेर काढले.

दरम्यान, प्रतीकच्या वडिलांनी रुग्णवाहिका सेवेवर गंभीर आरोप केले आहेत. घटनास्थळावर मुलगा जिवंत होता; मात्र रुग्णवाहिकेत ऑक्सिजन व डॉक्टर उपलब्ध नसल्याचा, तसेच चालकाने वाटेत इतर प्रवाशांना बसवल्याने वेळ वाया गेल्याचा आरोप त्यांनी केला. वेळेवर उपचार मिळाले असते तर मुलाचा जीव वाचला असता, असा दावा करत त्यांनी चौकशी व कारवाईची मागणी केली आहे.

रुद्रांश

श्रेया राजेंद्र पांडे

प्रतीक रामकिसन जगदाळे