मराठवाड्यातील रेल्वे प्रश्नांसाठी खासदार रामराव वडकुते यांची दक्षिण मध्य रेल्वेच्या महाव्यवस्थापकांसोबत महत्त्वपूर्ण बैठक!

हिंगोली–नांदेड रेल्वे दुहेरीकरणासह विविध मागण्यांवर सकारात्मक चर्चा , रेल्वे सुविधांच्या विस्तारासाठी खासदारांचा पुढाकार

लोकार्थ प्रातिनिधी गोपाळ सातपुते

हिंगोली मराठवाड्यातील रेल्वे प्रवाशांच्या समस्या, रेल्वे सुविधांचा विस्तार आणि प्रलंबित विकासकामांना गती मिळावी, या उद्देशाने राज्यसभा खासदार रामरावजी वडकुते यांनी सिकंदराबाद येथे दक्षिण मध्य रेल्वेचे महाव्यवस्थापक यांची भेट घेऊन महत्त्वपूर्ण बैठक घेतली. या बैठकीत मराठवाड्यातील विविध रेल्वे प्रश्नांवर सविस्तर चर्चा करून प्रवाशांच्या सोयीसाठी अनेक महत्त्वपूर्ण मागण्या मांडण्यात आल्या.

या बैठकीत हिंगोली–नांदेड रेल्वे मार्गाच्या दुहेरीकरणाचा प्रश्न प्राधान्याने उपस्थित करण्यात आला. या कामाबाबत लवकरात लवकर सकारात्मक निर्णय घेण्याची अपेक्षा राज्यसभा खासदार रामरावजी वडकुते यांनी व्यक्त केली.

तसेच LTT–नांदेड एक्स्प्रेसच्या वेळेत बदल करणे, पुणे–नांदेड रेल्वे गाडीच्या वेळापत्रकात प्रवाशांच्या सोयीचा विचार करणे, अकोला–पूर्णा पॅसेंजर गाडीचा विस्तार नांदेडपर्यंत करणे, अशा महत्त्वपूर्ण मागण्यांवर चर्चा करण्यात आली व इंटरसिटी एक्स्प्रेसला बोल्डा रेल्वे स्थानकावर थांबा देण्याबाबत संबंधित रेल्वे अधिकाऱ्यांकडे मागणी करण्यात आली. पूर्णा आणि हिंगोली येथील रेल्वेच्या मोकळ्या जागांचा सार्वजनिक-खासगी भागीदारी (PPP) तत्त्वावर विकास करण्याबाबतही बैठकीत चर्चा झाली.

मराठवाड्यातील रेल्वे कनेक्टिव्हिटी अधिक सक्षम करणे, प्रवाशांचा प्रवास सुखकर व सोयीस्कर करणे आणि रेल्वेच्या माध्यमातून या भागाच्या विकासाला चालना देणे, यासाठी आपण सातत्याने प्रयत्नशील असल्याचे खासदार रामराव वडकुते यांनी सांगितले.

या बैठकीस संघर्ष समितीचे गोवर्धन विरकुवर, अण्णा शेख, खलील बेलदार, प्रफुल जैन, प्रकाश नाईक, पांढरीनाथ ढाले, संजय कावडे यांच्यासह इतर मान्यवर उपस्थित होते.