हिंगोलीतील लक्ष्मी लाइफ केअर हॉस्पिटलमधीलडॉक्टरांनी रुग्णांसोबत केला दिवाळीचा आनंदोत्सव

लोकार्थ प्रतिनिधी गोपाल सातपुते

हिंगोली : दिवाळी हा आनंद, उत्साह आणि आपुलकीचा सण. मात्र आजारपणामुळे रुग्णालयात उपचार घेत असलेल्या रुग्णांना आणि त्यांच्या नातेवाईकांना अनेकदा सणाच्या आनंदापासून दूर राहावे लागते. हीच जाणीव ठेवून लक्ष्मी लाइफ केअर हॉस्पिटल, हिंगोली येथे दरवर्षीप्रमाणे याही वर्षी रुग्णांसोबत दिवाळी साजरी करण्यात आली.

या विशेष उपक्रमांतर्गत रुग्णालयात उपचारासाठी दाखल असलेल्या रुग्णांसह त्यांच्या नातेवाईकांसाठी स्वादिष्ट भोजनाची व्यवस्था करण्यात आली होती. विशेष म्हणजे रुग्णालयातील डॉक्टरांनीही रुग्ण आणि त्यांच्या नातेवाईकांसोबत एकत्र बसून भोजनाचा आस्वाद घेतला. यामुळे रुग्णालयातील वातावरण आनंदमय आणि कौटुंबिक झाले.

दिवाळीनिमित्त रुग्ण आणि त्यांच्या नातेवाईकांसोबत फटाके फोडून आनंद साजरा करण्यात आला. आजारपणाच्या काळात रुग्णांच्या चेहऱ्यावर हास्य फुलविणे, त्यांना मानसिक आधार देणे आणि आपण एका कुटुंबाचा भाग आहोत, ही भावना निर्माण करणे हा या उपक्रमामागील मुख्य उद्देश आहे.

या उपक्रमात अशोकजी अग्रवाल डॉ. अखिल अग्रवाल, डॉ. मयूर अग्रवाल, डॉ. प्रदीप राऊत, डॉ. पंजाब शेळके, डॉ. प्राची अग्रवाल आणि डॉ. विजया अग्रवाल यांनी सहभाग घेतला.

रुग्णसेवा ही केवळ वैद्यकीय उपचारांपुरती मर्यादित नसून त्यामध्ये आपुलकी, जिव्हाळा, माणुसकी आणि भावनिक आधार यांचाही समावेश असतो, याचे सुंदर उदाहरण लक्ष्मी लाइफ केअर हॉस्पिटलने या उपक्रमातून घालून दिले आहे. रुग्णांच्या चेहऱ्यावर आनंद फुलविणारी आणि माणुसकीचा दिवा प्रज्वलित करणारी ही दिवाळी हिंगोलीकरांसाठी निश्चितच प्रेरणादायी ठरली.