कल्याण-डोंबिवली महानगरपालिकेच्या (KDMC) ‘स्मार्ट सिटी’च्या दाव्यांचा पुरता पर्दाफाश करणारी धक्कादायक घटना समोर आली आहे. डोंबिवली पूर्वेतील मंजुनाथ नागरी आरोग्य केंद्राच्या मुख्य प्रवेशद्वारावरच कचऱ्याचे मोठे ढीग साचले असून, या परिसरात प्रचंड दुर्गंधी पसरली आहे. जिथे उपचारासाठी रुग्ण येतात, तिथेच अस्वच्छतेचे साम्राज्य निर्माण झाल्यामुळे नागरिकांच्या आरोग्याशी उघड उघड खेळ सुरू असल्याचा आरोप केला जात आहे.
दुर्गंधीमुळे नागरिक अन् रुग्ण हैराण
मंजुनाथ नागरी आरोग्य केंद्रामध्ये दररोज शेकडो रुग्ण आणि त्यांचे नातेवाईक उपचारासाठी येत असतात. मात्र, रुग्णालयात प्रवेश करतानाच कचऱ्याच्या ढिगाऱ्याचा सामना करावा लागत असल्याने रुग्ण आणि स्थानिक रहिवासी पुरते बेजार झाले आहेत. वारंवार तक्रारी करूनही केडीएमसीचे स्वच्छता विभाग याकडे दुर्लक्ष करत असल्याचे समोर आले आहे.
शिवसेनेने उठवला आवाज
या अस्वच्छतेच्या आणि प्रशासकीय दुर्लक्षाच्या प्रश्नावर शिवसेना (उद्धव बाळासाहेब ठाकरे) पक्षाने आक्रमक पवित्रा घेतला आहे. उपशहरप्रमुख प्रमोद कांबळे यांनी महापालिकेचे सहाय्यक आयुक्त प्रसाद ठाकूर यांची भेट घेऊन ही गंभीर बाब त्यांच्या निदर्शनास आणून दिली.
प्रवेशद्वारासमोरील कचराकुंडी तात्काळ हटवून परिसर स्वच्छ करण्याची मागणी करण्यात आली आहे. मात्र, अद्यापही योग्य ती कारवाई न झाल्याने स्थानिक नागरिकांमधून महापालिका प्रशासनाविरोधात तीव्र संताप व्यक्त केला जात आहे.
Other Articles
