मुख्य निवडणूक आयुक्त ज्ञानेश कुमार यांच्या विरोधात ठाकरे बंधूंचा ४ ऑक्टोबरला मोर्चा

लोकार्थ प्रतिनिधी

उद्धव आणि राज ठाकरे यांनी संयुक्त परिषदेत ही घोषणा केली. हा मोर्चा भायखळ्यातील रिचर्डसन क्रुडास कंपनी ते मुंबई महापालिका असा काढला जाईल. सकाळी १० वाजता मोर्चाला सुरूवात होईल. महापालिकेजवळ या मोर्चाचं रूपांतर सभेत होईल अशी माहिती मनसे अध्यक्ष राज ठाकरेंनी दिली.

राज ठाकरेंचा भाजपाला टोला
निवडणूक आयुक्तांबाबत जे काही सांगितलं जातंय, ते कपोलकल्पित आहे असं भाजपाने म्हटलं आहे. याबाबत विचारलं असता राज ठाकरे म्हणाले, आम्ही जर निवडणूक आयोगाविरोधात मोर्चा काढत असू तर मग भाजपाला काय त्रास होतो आहे? मराठीत एक म्हण आहे ‘खाई त्याला खवखवे’ असं म्हणत राज ठाकरेंनी भाजपाला टोला लगावला. मोर्चाच्या दिवशी इतर कुठल्याही पक्षाचा झेंडा नसेल. तिरंगा घेऊन आम्ही मोर्चात सहभागी होऊ असंही राज ठाकरे म्हणाले.
हा निवडणूक आयोगाच्या विरोधातला मोर्चा आहे. २०१७ आणि २०१८ मध्येही मी अनेक नेत्यांना भेटलो होतो, असे सांगत राज ठाकरे म्हणाले, ईव्हीएमच्या संदर्भातही मी चर्चा केली होती. ४ ऑक्टोबरला याबाबतची सगळी सविस्तर भूमिका आम्ही मांडू. ४ ऑक्टोबरच्या मोर्चानंतर पुढे काय करायचं ते आम्ही ठरवू. सर्वच राजकीय पक्षांना आम्ही या मोर्चासाठी आमंत्रण देत आहोत. हा कुठलाही राजकीय पक्षाच्या विरोधापेक्षा निवडणूक आयोगाचा जो काही गेल्या वर्षांतला कारभार आहे त्याविरोधातला मोर्चा आहे.
आम्ही पत्रक काढणार नाही, पण पण प्रत्येक पक्षाला फोन करून मोर्चामध्ये या हे आम्ही सांगणार आहोत. २ ऑक्टोबरला मोर्चा होतो आहे. त्यानंतर ४ तारखेला आमचा मोर्चा होतो आहे. त्यापुढेही लोक रस्त्यावर येतील. सरकारला आणि निवडणूक आयोगाला याबाबत उत्तर द्यावं लागेल. देशातली लोकशाही आणि संविधान वाचवण्याचा हा विषय असल्याने या मोर्चात कुठलाही झेंडा नसेल. ज्यांच्याकडून जी गोष्ट निवडणूक आयोगाच्या विरोधात करायची असेल तर ती त्यांनी करावी. हा काही स्पर्धेचा विषय नाही असंही राज ठाकरे यांनी म्हटलं आहे.