सावरगाव हडप येथे १० वर्षांपासून ई पीक पाहणीच नाही

पीक विमा आणि नुकसानभरपाईपासून शेतकरी वंचित; तहसीलदारांना निवेदन, तातडीने पाहणी न झाल्यास आंदोलनाचा इशारा

लोकार्थ प्रतिनिधी राहुल मुळे जालना

जालना तालुक्यातील मौजे सावरगाव हडप येथे मागील तब्बल १० वर्षांपासून ई पीक पाहणी झालेली नसल्याने येथील शेतकरी विविध शासकीय योजनांच्या लाभापासून वंचित राहत असल्याचा गंभीर प्रकार समोर आला आहे. ई पीक पाहणीअभावी पिकांच्या नोंदी उपलब्ध होत नसल्याने शेतकऱ्यांना पीक विमा तसेच नैसर्गिक आपत्तीमुळे होणाऱ्या नुकसानीची शासकीय भरपाई मिळण्यात अडचणी येत असल्याचे ग्रामस्थांनी निवेदनात म्हटले आहे.

या प्रश्नाकडे प्रशासनाचे लक्ष वेधण्यासाठी भाजपा जिल्हा उपाध्यक्ष शिवाजी शेजूळ आणि सावरगाव हडप येथील समस्त ग्रामस्थांच्या वतीने जालना तहसीलदारांना निवेदन देण्यात आले.

निवेदनात म्हटले आहे की, सावरगाव हडप येथे मागील १० वर्षांपासून ई पीक पाहणी झालेली नाही. त्यामुळे शेतकऱ्यांच्या शेतातील पिकांच्या नोंदी शासनाच्या संबंधित यंत्रणेकडे उपलब्ध होत नसल्याचा ग्रामस्थांचा आरोप आहे. परिणामी पीक विमा, नैसर्गिक आपत्तीमुळे होणारी नुकसानभरपाई आणि इतर शासकीय योजनांचा लाभ घेताना शेतकऱ्यांना अडचणींचा सामना करावा लागत आहे.

विशेष म्हणजे, या समस्येबाबत यापूर्वीही १० ऑक्टोबर २०२४ रोजी तक्रार करण्यात आली होती. मात्र, त्यानंतरही ई पीक पाहणीचा प्रश्न मार्गी लागला नसल्याचे निवेदनात नमूद करण्यात आले आहे. त्यामुळे प्रशासनाच्या कार्यपद्धतीबाबत ग्रामस्थांमध्ये नाराजी व्यक्त होत आहे.

सध्या पिकांची परिस्थिती बिकट असून शेतकऱ्यांसमोर विविध अडचणी निर्माण झाल्या आहेत. अशा परिस्थितीत ई पीक पाहणी न झाल्यामुळे शेतकऱ्यांना शासनाकडून मिळणाऱ्या मदतीपासून वंचित राहावे लागू नये, यासाठी प्रशासनाने तातडीने या प्रकरणाची दखल घ्यावी, अशी मागणी ग्रामस्थांनी केली आहे.

सावरगाव हडप येथील प्रत्येक शेतकऱ्याच्या शेताची ई पीक पाहणी तातडीने करण्यात यावी आणि पिकांच्या नोंदी शासनाच्या यंत्रणेत घेण्यात याव्यात, अशी मागणी निवेदनातून करण्यात आली आहे. तसेच यापूर्वी करण्यात आलेल्या तक्रारीवर कोणती कार्यवाही करण्यात आली, याचीही माहिती देण्यात यावी, अशी मागणी ग्रामस्थांनी केली आहे.

ई पीक पाहणी तातडीने करून शेतकऱ्यांच्या अडचणी दूर न केल्यास प्रशासनाविरोधात आंदोलन करण्याचा इशाराही ग्रामस्थांनी दिला आहे.

या निवेदनावर प्रभाकर सफाजी डोंगे, गंगाधर नारायण इंगोले, सुधाकर लक्ष्मण कटारे, शिवाजी तुळशीराम डोंगे, जनार्दन नारायण काबरे, तुकाराम हिरामण पठाडे, भगवान श्रीराम शेजूळ, गणेश विश्वनाथ काकडे, भरत पांडुरंग डोंगे, संतोष काशिनाथ शिंदे, रमेश एकनाथ कातकडे, मुरलीधर बोटे, भगवान डोंगे, ऋषिकेश डोंगे, आशाबाबू कचरू पठाडे यांच्यासह समस्त ग्रामस्थांच्या स्वाक्षऱ्या आहेत.

ई पीक पाहणीचा प्रश्न तातडीने सोडवून शेतकऱ्यांना पीक विमा आणि शासनाच्या नुकसानभरपाईपासून वंचित राहण्याची वेळ येऊ नये, यासाठी तहसील प्रशासनाने तत्काळ कार्यवाही करावी, अशी मागणी ग्रामस्थांनी केली आहे.