छत्रपती संभाजीनगर : बिहारमधील बोधगया येथे महाराष्ट्र भवन उभारण्यासाठी ८ ते १० एकर जमीन उपलब्ध करून द्यावी, अशी मागणी राज्याचे सामाजिक न्यायमंत्री संजय शिरसाट यांनी बिहारचे मुख्यमंत्री सम्राट चौधरी यांच्याकडे केली आहे. यासंदर्भात शिरसाट यांनी १७ नोव्हेंबर २०२६ रोजी पत्र पाठवलं आहे.
बोधगया हे भगवान गौतम बुद्ध यांच्या ज्ञानप्राप्तीचं पवित्र स्थान असून, जगभरातील बौद्ध अनुयायी, पर्यटक आणि अभ्यासकांसाठी महत्त्वाचं तीर्थक्षेत्र आहे. महाराष्ट्रातून दरवर्षी हजारो बौद्ध अनुयायी आणि पर्यटक बोधगयेला भेट देतात. त्यामुळे महाराष्ट्रातील भाविकांच्या निवासाची, भोजनाची आणि इतर सुविधांची व्यवस्था करण्यासाठी महाराष्ट्र भवन उभारण्याची आवश्यकता असल्याचं शिरसाट यांनी पत्रात म्हटलं आहे.
महात्मा ज्योतिबा फुले आणि डॉ. बाबासाहेब आंबेडकर यांच्या सामाजिक चळवळींमुळे महाराष्ट्राचा बौद्ध विचारांशी ऐतिहासिक संबंध असल्याचाही उल्लेख पत्रात करण्यात आला आहे. महाराष्ट्र भवनामुळे महाराष्ट्रातून येणाऱ्या भाविकांना निवास आणि अन्य सुविधा उपलब्ध होतील. त्याचबरोबर बिहार आणि महाराष्ट्र यांच्यातील सांस्कृतिक देवाणघेवाणीलाही चालना मिळेल, असं त्यांनी नमूद केलं आहे.
विशेष म्हणजे, या महाराष्ट्र भवनाच्या बांधकामाचा, विकासाचा आणि देखभालीचा संपूर्ण खर्च महाराष्ट्र सरकार करणार असल्याची ग्वाहीही शिरसाट यांनी दिली आहे.
यापूर्वी ४ ऑगस्ट २०२६ रोजी मुख्यमंत्री देवेंद्र फडणवीस यांनीही बिहारच्या मुख्यमंत्र्यांना यासंदर्भात पत्र पाठवलं होतं. त्याचाच संदर्भ देत शिरसाट यांनी आता ८ ते १० एकर जागा उपलब्ध करून देण्याची विनंती केली आहे. या प्रकल्पासाठी महाराष्ट्राच्या सामाजिक न्याय विभागाला बिहार सरकारशी समन्वय साधण्याचे निर्देशही देण्यात आले आहेत.

No Comment! Be the first one.