घृष्णेश्वर मंदिर सहा महिने बंद राहणार नाही; जिल्हाधिकाऱ्यांचे आश्वासन

वेरूळ येथील दुकानदार असोसिएशनचे पदाधिकारी, जिल्हा परिषद सदस्य व ग्रामस्थांची जिल्हाधिकाऱ्यांशी भेट; पर्यायी रस्त्याबाबतही सकारात्मक चर्चा

लोकार्थ प्रतिनिधी विजय चौधरी खुलताबाद
वेरूळ येथील बारावे ज्योतिर्लिंग श्री घृष्णेश्वर मंदिर बंद राहणार नाही, अशी ग्वाही जिल्हाधिकारी विनय गौडा जी.सी. यांनी वेरूळ येथील शिष्टमंडळाला दिली. त्यामुळे घृष्णेश्वर मंदिर बंद राहणार नाही.  भाविकांनी अफवांवर विश्वास न ठेवता मंदिरामध्ये दर्शनासाठी यावे, असे आवाहन करण्यात आले आहे.

श्री घृष्णेश्वर मंदिर देवस्थान ट्रस्टचे अध्यक्ष तथा जिल्हा परिषद सदस्य कृणाल दांडगे यांच्या नेतृत्वाखाली वेरूळ येथील ग्रामस्थांच्या शिष्टमंडळाने जिल्हाधिकारी विनय गौडा जी.सी. यांची जिल्हाधिकारी कार्यालयात भेट घेऊन श्री घृष्णेश्वर मंदिराबाबत सविस्तर चर्चा केली. 

वेरूळ येथील श्री घृष्णेश्वर मंदिर बंद ठेवण्याच्या चर्चेच्या पार्श्वभूमीवर वेरूळ येथील दुकानदार असोसिएशन संघटनेचे पदाधिकारी, जिल्हा परिषद सदस्य तसेच ग्रामस्थांनी जिल्हाधिकाऱ्यांची भेट घेऊन मंदिर सहा महिने बंद ठेवू नये, अशी विनंती केली.
यावेळी जिल्हाधिकाऱ्यांनी घृष्णेश्वर मंदिर सलग सहा महिने बंद ठेवण्यात येणार नसल्याचे आश्वासन दिले. काही अपरिहार्य कारणास्तव मंदिर बंद करण्याची आवश्यकता भासल्यास ते अत्यंत कमी कालावधीसाठी बंद ठेवण्याबाबत विचार केला जाईल, असे त्यांनी स्पष्ट केले.
तसेच मंदिर परिसरातील वाहतुकीचा प्रश्न सोडविण्यासाठी पर्यायी रस्त्याबाबत विचार करण्यात येईल. याशिवाय छोट्या वाहनांसाठी रस्ता सुरू राहील, याचीही काळजी घेतली जाईल, असे आश्वासन जिल्हाधिकाऱ्यांनी दिल्याची माहिती देण्यात आली.
घृष्णेश्वर मंदिर हे देशभरातील भाविकांचे श्रद्धास्थान असून मंदिरावर परिसरातील व्यावसायिक, दुकानदार व स्थानिक नागरिकांची उपजीविकाही अवलंबून आहे. त्यामुळे मंदिर दीर्घकाळ बंद राहू नये, तसेच भाविकांची गैरसोय होऊ नये, यासाठी स्थानिक नागरिकांनी प्रशासनाकडे आपली भूमिका मांडली.
या चर्चेमुळे भाविक, दुकानदार व ग्रामस्थांना दिलासा मिळाला असून मंदिराबाबत अधिकृत माहितीवरच विश्वास ठेवावा, असे आवाहन करण्यात येत आहे.