नागरिकांची सुरक्षा हीच प्राथमिकता – पिशोर पोलिसांचा दिवाळीनिमित्त सतर्कतेचा इशारा

उपशीर्षक : दुष्काळाच्या पार्श्वभूमीवर शेतकऱ्यांनी अधिक सावध राहण्याचे आवाहन

लोकार्थ प्रतिनिधी किशोर जाधव

पिशोर दिवाळी हा प्रकाशाचा, आनंदाचा सण असला तरी सणासुदीच्या काळात गुन्हेगारी वाढण्याची शक्यता असते. त्यामुळे नागरिकांनी अधिक सतर्क राहावे, असे आवाहन पिशोर पोलीस ठाण्याचे सहाय्यक पोलीस निरीक्षक कुणाल सूर्यवंशी यांनी केले आहे.
लक्ष्मीपूजनाच्या दिवशी घरात रोख रक्कम, दागिने आणि मौल्यवान वस्तू मोठ्या प्रमाणात असतात. त्यामुळे चोरी, फसवणूक टाळण्यासाठी खबरदारी घ्यावी. मोठी रक्कम किंवा दागिने घेऊन एकटे बाहेर पडू नये. बाजारपेठा, मंदिरे आणि गर्दीच्या ठिकाणी पर्स, मोबाईल आणि दागिन्यांची विशेष काळजी घ्यावी, असे आवाहन पोलिसांनी केले.
सध्या परिसरात दुष्काळी परिस्थिती असल्याने ग्रामीण भागात चोरीच्या घटनांमध्ये वाढ होण्याची शक्यता आहे. शेतातील जनावरे, कृषिपंपाच्या मोटारी, इलेक्ट्रिक केबल, वायर आणि काढणी केलेला शेतमाल चोरीला जाण्याच्या घटना घडू शकतात. त्यामुळे शेतकऱ्यांनी रात्रीच्या वेळी जनावरे सुरक्षित गोठ्यात बांधावीत. मोटार, केबल व इतर साहित्य सुरक्षित ठिकाणी ठेवावे. कापूस, मका, सोयाबीनसारखा शेतमाल उघड्यावर ठेवू नये. अनोळखी व्यक्ती किंवा संशयास्पद वाहने आढळल्यास तात्काळ पोलिसांना कळवावे. शक्य असल्यास गोठे आणि शेतमाल साठवणुकीच्या ठिकाणी सीसीटीव्ही बसवावेत.नागरिकांनी घराबाहेर पडताना दारे-खिडक्या व्यवस्थित बंद करावीत. सीसीटीव्ही व अलार्म यंत्रणा कार्यरत ठेवावी. गैरहजेरीबाबत शेजाऱ्यांना कल्पना द्यावी. घरात येणाऱ्या वीज, पाणी किंवा गॅस विभागाच्या कर्मचाऱ्यांची ओळख पटल्याशिवाय प्रवेश देऊ नये. तसेच सोशल मीडियावर प्रवासाची माहिती, मौल्यवान वस्तूंचे फोटो टाकणे टाळावे.
दागिने आणि रोख रक्कम शक्य असल्यास लॉकरमध्ये ठेवावी. फटाके फोडताना सुरक्षित अंतर राखावे, लहान मुले आणि वृद्धांना एकटे सोडू नये आणि पर्यावरणपूरक फटाक्यांना प्राधान्य द्यावे. कोणतीही संशयास्पद हालचाल आढळल्यास किंवा आपत्कालीन परिस्थितीत पोलीस मदत क्रमांक ११२ वर किंवा थेट पिशोर पोलीस ठाण्याशी संपर्क साधावा, असे आवाहन सपोनि कुणाल सूर्यवंशी यांनी केले आहे.