भेंडाळ्यात आदित्य ठाकरेंचा शेतकऱ्यांशी संवाद; दुष्काळाच्या झळा जाणून घेतल्या!

गावाच्या पारावर शेतकऱ्यांसोबत बसून साधला आपुलकीचा संवाद; शेतीचे नुकसान, आर्थिक अडचणी आणि दिवाळीतील परिस्थितीची केली विचारपूस

लोकार्थ प्रतिनिधी विजय बनसोड

गंगापूर : छत्रपती संभाजीनगर जिल्ह्यातील गंगापूर तालुक्यातील भेंडाळा येथे आज शिवसेना नेते तथा आमदार आदित्य ठाकरे यांनी शेतकऱ्यांची भेट घेऊन त्यांच्या व्यथा जाणून घेतल्या. गावाच्या पारावर शेतकऱ्यांसोबत बसून त्यांनी अत्यंत आपुलकीने संवाद साधत त्यांच्या अडचणींची विचारपूस केली.

यावेळी शेतकऱ्यांनी दुष्काळामुळे शेतीचे झालेले नुकसान, हाताला काम नसल्याने निर्माण झालेली आर्थिक ओढाताण, कुटुंबाचा उदरनिर्वाह, मुलांचे शिक्षण आणि दैनंदिन गरजांसाठी करावी लागणारी धडपड याबाबत आपल्या भावना व्यक्त केल्या. ऐन दिवाळीचा सण उंबरठ्यावर आला असतानाही शेतकऱ्यांच्या घराघरांत आनंदाऐवजी चिंतेचे वातावरण असल्याचे चित्र यावेळी समोर आले.

शेतकऱ्यांच्या समस्या केवळ ऐकून न घेता त्यांच्या परिस्थितीची जाणीव ठेवत आदित्य ठाकरे यांनी प्रत्येकाशी संवाद साधला. शेतकऱ्यांच्या अडचणी, त्यांच्या कुटुंबीयांची परिस्थिती आणि सणासुदीच्या काळात त्यांना करावा लागणारा संघर्ष याबाबत त्यांनी आस्थेने माहिती घेतली. या भेटीमुळे शेतकऱ्यांनीही मनमोकळेपणाने आपल्या व्यथा मांडल्या.

यावेळी शिवसेना नेते चंद्रकांत खैरे, अंकुश सुंब, अविनाश पाटील, सुभाष कानडे पाटील, कारभारी दुबिले, पोपटराव गाडेकर, विष्णू पोटे आदीसह ग्रामस्थउपस्थित होते.