हिंगोलीत शेतकऱ्यांच्या मोटार पंपांची चोरी करणारी टोळी २४ तासांत जेरबंद; ६ आरोपी अटकेत

लोकार्थ प्रतिनिधी गोपाल सातपुते

हिंगोली : शेतकऱ्यांच्या शेतातील पाण्याचे मोटार पंप चोरी करणाऱ्या टोळीचा स्थानिक गुन्हे शाखेच्या पथकाने अवघ्या २४ तासांत पर्दाफाश केला आहे. या प्रकरणी सहा आरोपींना ताब्यात घेण्यात आले असून, त्यांच्याकडून एकूण ९१ हजार रुपये किमतीचा मुद्देमाल जप्त करण्यात आला आहे.

हिंगोली जिल्ह्यातील चोरी व घरफोडीचे गुन्हे उघडकीस आणण्याचे आदेश पोलीस अधीक्षक कमलेश मीना यांनी दिले होते. त्यानुसार पोलीस निरीक्षक मोहन भोसले यांच्या मार्गदर्शनाखाली सहाय्यक पोलीस निरीक्षक वसंत आरसेवार यांच्या पथकाने तपास सुरू केला.

५ नोव्हेंबर २०२६ रोजी कळमनुरी पोलीस ठाण्यात दाखल झालेल्या मोटार पंप चोरीच्या गुन्ह्याचा समांतर तपास करताना पोलिसांना गोपनीय माहिती मिळाली. या माहितीच्या आधारे खापरखेडा येथील सचिन रामचंद्र पोटे, देवानंद दुलाजी पोटे, सदानंद उत्तमराव पोटे, सचिन प्रल्हाद चिभडे, मोरवाडी येथील विनोद मोतीराम खरवडे आणि कळमनुरीतील इंदिरानगर येथील शेख माजिद शेख हबीब या सहा जणांना ताब्यात घेण्यात आले.

पोलिसांनी केलेल्या चौकशीत आरोपींनी कळमनुरी पोलीस ठाण्यातील दोन आणि बाळापूर पोलीस ठाण्यातील दोन, अशा एकूण चार चोरीच्या गुन्ह्यांची कबुली दिल्याचे पोलिसांनी सांगितले. त्यांच्याकडून शेतकऱ्यांचे पाण्याचे मोटार पंप, चोरीसाठी वापरलेली मोटारसायकल आणि चोरीच्या साहित्याच्या विक्रीतून मिळालेले रोख पैसे असा एकूण ९१ हजार रुपयांचा मुद्देमाल जप्त करण्यात आला आहे.

या सहाही आरोपींना पुढील कारवाईसाठी कळमनुरी पोलीस ठाण्यात हजर करण्यात आले आहे.

ही कारवाई पोलीस अधीक्षक कमलेश मीना आणि स्थानिक गुन्हे शाखेचे पोलीस निरीक्षक मोहन भोसले यांच्या मार्गदर्शनाखाली सहाय्यक पोलीस निरीक्षक वसंत आरसेवार तसेच पोलीस अंमलदार गजानन पोकळे, पांडुरंग राठोड, लिंबाजी वाव्हळे, निरंजन नलवार, सतीश जाधव, नरेंद्र साळवे आणि दत्ता नागरे यांनी केली.