अभंग-भक्तिगीतांच्या स्वरांनी पैठणच्या नाथ मंदिरात रंगली दीपावली पाडवा पहाट..

बाल सुपरस्टार संकल्प काळे यांच्या मधुर स्वरांनी समाधी मंदिर परिसर भक्तिरसात न्हाऊन निघाला; हजारो भाविकांची उपस्थिती

लोकार्थ प्रतिनिधी चंद्रकांत आंबिलवादे

“अबीर गुलाल उधळीत, रंग नाथा घरी नाचे माझा सखा पांडुरंग…” तसेच “माझे माहेर पंढरी आहे भिवरेच्या तिरी, बाप आणि आई माझे विठ्ठला रुखुमाई…” अशा एकापेक्षा एक सुरेल वारकरी सांप्रदायिक अभंग आणि भक्तिगीतांच्या सुमधुर स्वरांनी श्रीक्षेत्र पैठण येथील श्रीसंत एकनाथ महाराज समाधी मंदिर परिसर दीपावली पाडव्याच्या पहाटे भक्तिरसात चिंब झाला. ‘भानुदास एकनाथ’च्या जयघोषाने संपूर्ण मंदिर परिसर दुमदुमून गेला.

श्रीसंत एकनाथ महाराज मंदिर विश्वस्त मंडळाच्या वतीने दरवर्षीप्रमाणे यंदाही दीपावली पाडवा पहाट अभंग व भक्तिगीतांचा कार्यक्रम आयोजित करण्यात आला होता. विश्वस्त मंडळाचे अध्यक्ष आमदार विलास बापू भुमरे आणि कार्यकारी विश्वस्त दादा पाटील बारे यांच्या मार्गदर्शनाखाली समाधी मंदिरात हा भक्तिमय सोहळा पार पडला.

यावेळी बाल सुपरस्टार संकल्प काळे यांनी आपल्या मधुर वाणीतून विविध वारकरी सांप्रदायिक अभंग, भक्तिगीते आणि भजनांचे सादरीकरण केले. त्यांच्या सुमधुर गायनाला उपस्थित भाविकांनी उत्स्फूर्त दाद दिली. अभंगांच्या तालावर भाविक तल्लीन झाले होते. पहाटेच्या प्रसन्न वातावरणात नाथांच्या चरणी भक्तिसंगीताची अनोखी सेवा अर्पण करण्यात आली. या कार्यक्रमाचा हजारो भाविकांनी लाभ घेतला.

या प्रसंगी पंचक्रोशीतील गायनसम्राट, विविध महाराज मंडळी, दूध संघाचे संचालक नंदलाल काळे, पंचायत समिती सदस्य सखुबाई झारगड, माजी नगरसेवक शहादेव लोहारे, ह.भ.प. लक्ष्मण चौरे यांच्यासह अनेक मान्यवर व भाविक मोठ्या संख्येने उपस्थित होते.

वारकरी अभंगांच्या गजरात आणि नाथांच्या जयघोषात साजरी झालेली ही दीपावली पाडवा पहाट पैठणकरांसह भाविकांसाठी अविस्मरणीय ठरली.