शहीद जवानांना रक्तदानातून अभिवादन!

चुडावा पोलीस स्थानकात भव्य रक्तदान शिबिर; पोलीस अधिकारी, पोलीस पाटील, सरपंच, सैनिकांसह ग्रामस्थांचा उत्स्फूर्त सहभाग

लोकार्थ प्रतिनिधी सुशिल गायकवाड पूर्णा

पूर्णा देशाच्या रक्षणासाठी आपल्या प्राणांची आहुती देणाऱ्या शूरवीर शहीद जवानांच्या स्मृतींना अभिवादन करण्यासाठी पूर्णा तालुक्यातील चुडावा पोलीस स्थानकाच्या वतीने १३ नोव्हेंबर रोजी शहीद दिनानिमित्त भव्य रक्तदान शिबिराचे आयोजन करण्यात आले होते. या उपक्रमाला पोलीस अधिकारी व कर्मचारी, पोलीस पाटील, सरपंच, सुट्टीवर आलेले सैनिक, वकील तसेच परिसरातील ग्रामस्थांनी उत्स्फूर्त प्रतिसाद देत मोठ्या संख्येने रक्तदान केले. शहीद जवानांच्या त्यागाला रक्तदानातून अभिवादन करण्याबरोबरच सामाजिक बांधिलकी जपण्याचा प्रेरणादायी संदेश या शिबिरातून देण्यात आला.

चुडावा पोलीस स्थानक परिसरात आयोजित या रक्तदान शिबिरात समाजातील विविध घटकांनी सहभाग नोंदविला. रक्तदान हे श्रेष्ठदान असून, एखाद्या गरजू रुग्णाला वेळेवर रक्त उपलब्ध झाल्यास त्याचे प्राण वाचू शकतात, या भावनेतून अनेकांनी स्वयंस्फूर्तीने रक्तदान केले. विशेष म्हणजे पोलीस दलातील अधिकारी व कर्मचाऱ्यांसोबतच गावोगावच्या पोलीस पाटील, सरपंच, ग्रामीण भागातील नागरिक आणि सुट्टीवर आलेल्या सैनिकांनीही या उपक्रमात सहभाग घेतला.

यावेळी उपविभागीय पोलीस अधिकारी कुंदन कुमार वाघमारे, सहाय्यक पोलीस निरीक्षक शिवाजी शिंगणवाड यांच्यासह पोलीस कर्मचारी उपस्थित होते. तसेच पोलीस पाटील, होमगार्ड, सैनिक, वकील, सरपंच आणि परिसरातील नागरिकांनी रक्तदान करून सामाजिक उत्तरदायित्वाची जाणीव करून दिली.

शहीद दिनाच्या निमित्ताने आयोजित करण्यात आलेल्या या उपक्रमामुळे पोलीस आणि नागरिक यांच्यातील सामाजिक समन्वयाचे दर्शन घडले. देशासाठी बलिदान देणाऱ्या शूरवीरांच्या स्मृती जपण्याचा सर्वोत्तम मार्ग म्हणजे समाजासाठी विधायक कार्य करणे, हा संदेश या रक्तदान शिबिरातून अधोरेखित झाला.

शहीद जवानांचे बलिदान स्मरणात ठेवत रक्तदानाच्या माध्यमातून गरजूंचे प्राण वाचविण्याचा संकल्प चुडावा पोलीस स्थानकाच्या या उपक्रमातून व्यक्त झाला.