पूर्णा-नांदेड महामार्गावर चुडावा गावाजवळ काळाचा घाला
लोकार्थ प्रतिनिधी सुशिल गायकवाड
पूर्णा-नांदेड महामार्गावर अपघातांचे सत्र सुरूच असून, चुडावा गावाजवळ ऊसाने भरलेल्या ट्रॅक्टर आणि दुचाकीच्या भीषण अपघातात २८ वर्षीय तरुणाला आपला जीव गमवावा लागला. शुक्रवार, दि. २० नोव्हेंबर रोजी रात्री साडेनऊच्या सुमारास राज धाब्याजवळ ही हृदयद्रावक घटना घडली. या घटनेमुळे पूर्णा शहरातील आनंदनगर परिसरात शोककळा पसरली आहे.
पवन एकनाथ गोरे (वय २८, रा. आनंदनगर, पूर्णा) असे मृत तरुणाचे नाव आहे. मिळालेल्या माहितीनुसार, पवन गोरे हा नांदेड येथील काम आटोपून दुचाकीने पूर्णाकडे परतत होता. दरम्यान, चुडावा गावाजवळील राज धाब्याच्या परिसरात त्याच्या दुचाकीची ऊसाने भरलेल्या ट्रॅक्टरशी जोरदार धडक झाली. अपघाताची तीव्रता इतकी भीषण होती की, पवन याच्या डोक्याला गंभीर दुखापत होऊन त्याचा घटनास्थळीच मृत्यू झाला.
अपघात घडताच परिसरातील नागरिकांनी घटनास्थळी धाव घेत जखमी तरुणाला तातडीने पूर्णा येथील रुग्णालयात दाखल केले. मात्र, वैद्यकीय तपासणीनंतर डॉक्टरांनी त्याला मृत घोषित केले. अवघ्या २८व्या वर्षी तरुणाचा अपघाती मृत्यू झाल्याने हळहळ व्यक्त होत आहे.
घटनेची माहिती मिळताच चुडावा पोलीस ठाण्याचे ठाणेदार शिवाजी सिंगणवाड यांच्यासह पोलीस हेडकॉन्स्टेबल मिटके, जमादार आनंदा तोटेवाड, पोलीस कॉन्स्टेबल संतोष जाधव व इतर कर्मचाऱ्यांनी घटनास्थळी धाव घेतली. पोलिसांनी अपघाताचा पंचनामा करून दोन्ही वाहने ताब्यात घेतली. मृतदेह शवविच्छेदनासाठी पाठविण्यात आला असून, त्यानंतर तो नातेवाईकांच्या स्वाधीन करण्यात आला.
दरम्यान, अपघातानंतर ट्रॅक्टर चालक घटनास्थळावरून निघून गेल्याची प्राथमिक माहिती आहे. पोलिसांनी अपघाताची नोंद करून वाहने पोलीस ठाण्यात जमा केली आहेत. या प्रकरणाचा पुढील तपास जमादार आनंदा तोटेवाड करीत आहेत.
No Comment! Be the first one.