उदगीरमध्ये ६ नोव्हेंबरला ‘स्वर दीपावलीचे’ सुरेल गीतांचा अविस्मरणीय संगीत सोहळा

ज्येष्ठ नागरिक संघ व सहयोगअर्बन को-ऑपरेटिव्ह बँकेचा संयुक्त उपक्रम; छत्रपती शिवाजीराजे महाविद्यालयात पहाटे ६ वाजता आयोजन

लोकार्थ प्रतिनिधी बालाजी देवकते

उदगीर : दिवाळीच्या मंगलमय वातावरणात संगीतप्रेमींना सुरेल गाण्यांची मेजवानी अनुभवता यावी, यासाठी ज्येष्ठ नागरिक संघ, उदगीर आणि सहयोग अर्बन को-ऑपरेटिव्ह बँक लि., उदगीर यांच्या संयुक्त विद्यमाने शुक्रवार, दि. ६ नोव्हेंबर २०२६ रोजी ‘स्वर दीपावलीचे’ या विशेष संगीत मैफलीचे आयोजन करण्यात आले आहे.

ही मैफल छत्रपती शिवाजीराजे महाविद्यालय, उदगीर येथे पहाटे ६ वाजता होणार असून कार्यक्रमाचे प्रवेशद्वार सर्व संगीतप्रेमींसाठी विनामूल्य आणि खुले ठेवण्यात आले आहे.

या संगीत मैफलीत गायक श्री. नरसिंग ऊर्फ पराग देसाई, गायिका सौ. आसावरी दागलुरकर देसाई आणि कु. आदिश्री देसाई आपल्या सुरेल गायनाने रसिकांना मंत्रमुग्ध करणार आहेत. तसेच तबल्यावर महेश केंगार, निवेदन शिल्पा देशपांडे, सिंथेसायझरवर जयंत गोडबोले, पखवाजवर बंकट कुमार बैरागी आणि टाळवादनावर पृथ्वीराज येरेगुंडे साथसंगत करणार आहेत.

या कार्यक्रमाला गोपाळ जोशी गुरुजी यांचे मार्गदर्शन लाभले असून ते ओंकार संगीत विद्यालय, उदगीरचे संचालक आहेत.

पहाटेच्या प्रसन्न वातावरणात सुरांची बरसात, गाण्यांची रंगत आणि दीपावलीचा मंगलमय प्रकाश अनुभवण्याची संधी उदगीरकरांना मिळणार आहे. तरुण-तरुणी, विद्यार्थी, महिला, ज्येष्ठ नागरिक तसेच सर्व संगीतप्रेमींनी मोठ्या संख्येने उपस्थित राहून या अविस्मरणीय संगीत मैफलीचा आनंद घ्यावा, असे आवाहन ज्येष्ठ नागरिक संघ, उदगीर आणि सहयोग अर्बन को-ऑपरेटिव्ह बँकेच्या वतीने करण्यात आले आहे.