ग्रामदैवत कर्णपुरा येथील श्री तुळजाभवानी मातेचा शारदीय नवरात्र महोत्सव सुरू

अंबादास दानवे यांच्या हस्ते घटस्थापना व महाआरती

लोकार्थ प्रतिनिधी विजय देऊळगावकर

छत्रपती संभाजीनगर : शहराचे ग्रामदैवत असलेल्या कर्णपुरा येथील श्री तुळजाभवानी मातेच्या शारदीय नवरात्र महोत्सवाला आजपासून सुरुवात झाली. कर्णपुरा मंदिर संस्थापक अध्यक्ष तथा आमदार अंबादास दानवे यांच्या हस्ते सकाळी सात वाजता घटस्थापना करण्यात आली. पारंपरिक वाद्यांच्या गजरात आणि मंगलमय वातावरणात महाआरती करून नवरात्रोत्सवाचा प्रारंभ करण्यात आला.

तब्बल 350 वर्षांची ऐतिहासिक परंपरा लाभलेल्या या मंदिरात नवरात्रोत्सवाच्या काळात राज्याच्या विविध भागांतून हजारो भाविक दर्शनासाठी येतात. नऊ दिवस चालणाऱ्या या उत्सवानिमित्त कर्णपुरा मैदानावर भव्य यात्राही भरते.

राज्यातील शेतकऱ्यांवर आलेले संकट दूर व्हावे, शेतकरी बांधवांना सुखाचे दिवस यावेत आणि सर्वांच्या जीवनात सुख-समृद्धी नांदावी, यासाठी अंबादास दानवे यांनी आई तुळजाभवानीच्या चरणी साकडे घातले.