पैठणमध्ये ‘जल है विश्व’चा संदेश; कलापथकातून जलसंवर्धनाची जनजागृती

पाण्याचा काटकसरीने वापर, जलसंपत्तीचे संवर्धन आणि सिंचन नियोजनासाठी नागरिक-शेतकऱ्यांना आवाहन

लोकार्थ प्रतिनिधी चंद्रकांत आंबिलवादे

पैठण – जलसंपत्तीचे संवर्धन, पाण्याचा काटकसरीने वापर आणि योग्य सिंचन नियोजनाबाबत नागरिक तसेच शेतकऱ्यांमध्ये जनजागृती करण्यासाठी पैठण शहरात जलप्रबोधनात्मक कलापथकाच्या माध्यमातून जनजागरण मोहीम राबविण्यात आली.

कार्यकारी संचालक, गोदावरी मराठवाडा पाटबंधारे महामंडळ, अधीक्षक अभियंता तसेच पैठण कार्यकारी अभियंता, जलसंपदा विभाग यांच्या वतीने ही मोहीम आयोजित करण्यात आली. याअंतर्गत नाद फाउंडेशनच्या ‘जल है विश्व’ या जलप्रबोधनात्मक कलापथकाद्वारे विविध संदेश देत नागरिकांचे लक्ष वेधण्यात आले.

पैठण शहरातील छत्रपती शिवाजी महाराज यांच्या पुतळ्यासमोर सोमवारी रात्री या जनजागृती कार्यक्रमाचे आयोजन करण्यात आले होते. कलापथकाच्या माध्यमातून पाण्याचे महत्त्व, जलसंपत्तीचे संवर्धन, पाण्याचा काटकसरीने वापर आणि भविष्यातील पाणीटंचाई टाळण्यासाठी योग्य नियोजन करण्याचा संदेश देण्यात आला.

या कार्यक्रमाच्या यशस्वीतेसाठी कार्यकारी अभियंता गणेश हसे, नाथसागर धरणाच्या उपअभियंता श्रद्धा निंबाळकर, मंगेश शेलार तसेच जलसंपदा विभागातील अधिकारी व कर्मचाऱ्यांनी परिश्रम घेतले.