बाटल्यांतून थेंबथेंब पाणी देत वाचवली करपलेली कपाशी; शेख बशीर यांच्या जिद्दीला सलाम

लोकार्थ प्रतिनिधी रुपेश दिक्षित

माहूर तालुक्यात दुष्काळसदृश परिस्थिती निर्माण झाली असून कपाशीची झाडे वाळू लागली होती. एकरभर शेतातील कपाशीला पारंपरिक पद्धतीने पाणी देणे अशक्य होते. यावर मात करण्यासाठी शेख बशीर यांनी प्लास्टिकच्या टाकाऊ बाटल्यांचा थेंबथेंब पाणी देणारा जुगाड तयार केला. त्यांनी शेतातील कपाशीच्या प्रत्येक झाडाजवळ बांबूच्या लहान कमच्या रोवल्या. त्यावर पाण्याच्या रिकाम्या बाटल्या बांधल्या.
या बाटल्यांच्या बुडाला बारीक छिद्र पाडून त्यातून थेट कपाशीच्या मुळापाशी थेंबथेंब पाणी पडेल, अशी व्यवस्था केली. दररोज या बाटल्यांमध्ये पाणी भरण्यासाठी त्यांची आणि त्यांच्या कुटुंबाची मोठी कसरत सुरू असते. पण, त्यांच्या या ‘थेंबथेंब’ मेहनतीमुळे करपून लागलेल्या कपाशीला नवीन पालवी फुटली असून पिकाला एकप्रकारे संजीवनीच मिळाली आहे.
हताश होण्यापेक्षा जिद्दीने परिस्थितीला सामोरे जा
१) एकीकडे पावसाअभावी शेतकरी हतबल झाला असताना, शेख बशीर यांनी दाखवलेली ही धडपड आणि जिद्द वाखाणण्याजोगी आहे. निसर्गाच्या लहरीपणामुळे हात टेकण्याऐवजी शेतातील पीक वाचवण्यासाठी बळीराजा कोणत्या थराला जाऊन मेहनत करू शकतो, याचे हे जिवंत उदाहरण ठरले आहे.
२) तर ज्या शेतकऱ्यांकडे स्प्रिंकलरची व्यवस्था आहे ते त्याचा वापर करीत आहेत. तर काही ठिकाणी हंड्याने कपाशीला पाणी घालण्यात येत आहे.