विजय देऊळगावकर
छत्रपती संभाजीनगर : शहरातील मुकुंदवाडी परिसरात दहशत निर्माण करणाऱ्या सराईत गुन्हेगारावर पोलिसांनी एमपीडीएअंतर्गत कारवाई केली. धिरज रविंद्र केदारे (वय २६, रा. संजयनगर गल्ली नं. १२, मुकुंदवाडी) याच्याविरुद्ध महाराष्ट्र झोपडपट्टीदादा, हातभट्टीवाले, औषध द्रव्यांचे गुन्हेगार व धोकादायक व्यक्ती अधिनियम (MPDA) १९८१ अंतर्गत स्थानबद्धतेचा आदेश जारी करण्यात आला.
केदारे याच्याविरुद्ध मुकुंदवाडी तसेच एमआयडीसी सिडको परिसरात घातक हत्यारांनी किंवा साधनांनी दुखापत करणे, जबरी चोरी, दहशत निर्माण करणे, सार्वजनिक शांततेचा भंग करणे, धमकी देणे यांसह विविध गंभीर स्वरूपाचे गुन्हे दाखल आहेत. त्याच्या गुन्हेगारी कारवायांना आळा घालण्यासाठी पोलिसांनी ही प्रतिबंधात्मक कारवाई केली.
पोलिस आयुक्त प्रवीण पवार यांच्या आदेशानुसार तसेच वरिष्ठ अधिकाऱ्यांच्या मार्गदर्शनाखाली ही कारवाई करण्यात आली. न्यायालयीन प्रक्रिया पूर्ण झाल्यानंतर केदारे याला १४ सप्टेंबर रोजी कोल्हापूर मध्यवर्ती कारागृह, कळंबा, कोल्हापूर येथे स्थानबद्ध करण्यात आले.
No Comment! Be the first one.