अपर पोलीस अधीक्षक विक्रांत साळी, उपविभागीय पोलीस अधिकारी अनंत कुलकर्णी यांच्या हस्ते मोबाईलचे वाटप

राहुल मुळे – ( लोकार्थ प्रतिनिधी जालना )

जालना शहरातील कदीम जालना पोलीस ठाण्याच्या हद्दीतून चोरीला गेलेले तब्बल १६७ मोबाईल फोन पोलिसांनी शोधून काढत ते संबंधित नागरिकांना परत केले. कदीम जालना पोलिसांनी केलेल्या या मोठ्या कारवाईमुळे मोबाईल हरवलेल्या नागरिकांना दिलासा मिळाला असून, मोबाईल परत मिळाल्याने नागरिकांनी आनंद व्यक्त केला आहे.
जालना शहरातील गांधी चमन, रेल्वे स्थानक, रविवार बाजार, मम्मादेवी परिसर तसेच इतर विविध भागांतून मोबाईल चोरीच्या घटना घडल्या होत्या. या प्रकरणांचा तपास करत कदीम जालना पोलिसांनी चोरीचे मोबाईल हस्तगत केले. या कारवाईदरम्यान तीन आरोपींना ताब्यात घेण्यात आले असून, या प्रकरणात आणखी आरोपी वाढण्याची शक्यता पोलिसांनी व्यक्त केली आहे.
कदीम जालना पोलीस ठाण्याच्या वतीने आयोजित कार्यक्रमात अपर पोलीस अधीक्षक विक्रांत साळी, उपविभागीय पोलीस अधिकारी अनंत कुलकर्णी आणि कदीम जालना पोलीस ठाण्याचे पोलीस निरीक्षक जनार्दन शेवाळे यांच्या हस्ते संबंधित नागरिकांना त्यांचे मोबाईल परत करण्यात आले.
मोबाईल परत मिळाल्याने नागरिकांनी पोलिसांचे आभार मानले. या कारवाईत अजीम अन्सारी यांनी महत्त्वाची भूमिका बजावली.
कदीम जालना पोलिसांच्या या कारवाईमुळे चोरीच्या मोबाईलचा शोध घेऊन ते नागरिकांना परत मिळवून देण्यात यश आले असून, नागरिकांमधून पोलिसांच्या कार्याचे कौतुक केले जात आहे.