वाढत्या गुन्हेगारीला आळा; योगेश जाधवची एमपीडीएअंतर्गत कारागृहात रवानगी

विजय देऊळगावकर

छत्रपती संभाजीनगर : वाढत्या गुन्हेगारी व धोकादायक कारवायांमुळे पोलिसांच्या रडारवर असलेल्या योगेश मारुती जाधव (वय ३२, रा. दहेगाव बंगला, ता. गंगापूर) याच्याविरुद्ध पोलिस आयुक्तांनी एमपीडीए कायद्यान्वये स्थानबद्धतेचा आदेश काढला आहे.

जाधव याच्याविरुद्ध वाळूज पोलिस ठाण्यात घातक शस्त्राने इच्छापूर्वक जबर दुखापत करणे, दुखापत करणे, शांतता भंग करण्याच्या उद्देशाने अपमान करणे आणि धाकधपटशा करणे आदी गंभीर गुन्हे दाखल आहेत. यापूर्वी त्याच्याविरुद्ध प्रतिबंधात्मक कारवाई करण्यात आली होती. मात्र, त्यानंतरही त्याने गुन्हेगारी कारवाया सुरू ठेवल्याचे पोलिसांनी नमूद केले आहे.

या पार्श्वभूमीवर पोलिस आयुक्त प्रवीण पवार यांनी एमपीडीए कायदा १९८१ मधील कलम ३(१) अन्वये स्थानबद्धतेचा आदेश जारी केला. आदेशाची २२ सप्टेंबर रोजी अंमलबजावणी करून योगेश जाधव याला चंद्रपूर जिल्हा कारागृहात स्थानबद्ध करण्यात आले.