शिक्षणासाठी अख्खे गाव एकवटवले लोकवर्गणीतून जमले दीड लाख

पारडीच्या शाळेचा कायापालट; विद्यार्थ्यांसाठी रात्रीही विशेष अभ्यासवर्ग

लोकार्थ प्रतिनिधी गोपाल सातपुते

हिंगोली – गावाच्या विकासासाठी ग्रामस्थांनी एकजुटीने पुढाकार घेतला, तर शासकीय शाळेचाही कायापालट होऊ शकतो, हे औंढा नागनाथ तालुक्यातील पारडी (सावळी) येथील ग्रामस्थांनी दाखवून दिले आहे. ग्रामस्थांच्या लोकसहभागातून जिल्हा परिषद शाळेच्या विकासाला चालना मिळाली असून, विद्यार्थ्यांना दर्जेदार शैक्षणिक वातावरण उपलब्ध करून देण्यासाठी शिक्षक आणि ग्रामस्थ एकत्रितपणे प्रयत्न करत आहेत.

गावकऱ्यांनी एकत्र येत सुमारे दीड लाख रुपयांची लोकवर्गणी जमा केली. या निधीतून शाळेच्या भौतिक सुविधांमध्ये सुधारणा करण्यात आली. शाळेची रंगरंगोटी, आवश्यक शैक्षणिक साहित्य, बीजगणित व विज्ञान विषयांच्या अभ्यासासाठी उपयुक्त शैक्षणिक साधने, तसेच विद्यार्थ्यांसाठी स्वच्छ व सुंदर वातावरण निर्माण करण्यावर भर देण्यात आला आहे.

शिक्षकांचा पुढाकार; रात्रीही विद्यार्थ्यांसाठी अभ्यासवर्ग

शाळेतील शिक्षकांनी विद्यार्थ्यांच्या शैक्षणिक गुणवत्तावाढीसाठी विशेष पुढाकार घेतला आहे. शिक्षक पेजारराव पोळ यांच्या पुढाकारातून दररोज रात्री ७ ते ९.३० या वेळेत विद्यार्थ्यांसाठी विशेष अभ्यासवर्ग घेतले जात आहेत. या अभ्यासवर्गात विद्यार्थ्यांचा अभ्यास, विषयांचे मार्गदर्शन आणि सराव परीक्षा यावर भर दिला जात आहे. विद्यार्थ्यांना केवळ पुस्तकी ज्ञान न देता त्यांच्या सर्वांगीण विकासासाठी प्रयत्न केले जात आहेत. विद्यार्थ्यांचे शैक्षणिक भविष्य उज्ज्वल व्हावे, त्यांना अभ्यासाची गोडी लागावी आणि परीक्षांमध्ये चांगले यश मिळावे, हा या उपक्रमामागील मुख्य उद्देश आहे.

लोकसहभागातून शाळेचा विकास

शाळेच्या विकासासाठी ग्रामस्थांनी आर्थिक योगदान देत मोलाची भूमिका बजावली. या निधीतून शाळेच्या सुविधांमध्ये सुधारणा करण्यात आली. शैक्षणिक साहित्य आणि विद्यार्थ्यांना उपयोगी पडणारी साधने उपलब्ध झाल्यामुळे शाळेतील शैक्षणिक वातावरण अधिक चांगले होण्यास मदत झाली आहे.

गावकरी, शिक्षक आणि पालकांची एकजूट

शाळेच्या विकासासाठी ग्रामस्थांनी आर्थिक हातभार लावला, तर शिक्षकांनी वेळ आणि मेहनत देऊन विद्यार्थ्यांच्या गुणवत्तावाढीची जबाबदारी स्वीकारली. ग्रामस्थ, शिक्षक आणि पालक यांच्या एकजुटीतून ग्रामीण भागातील जिल्हा परिषद शाळाही गुणवत्तापूर्ण शिक्षणाचे केंद्र बनू शकते, हे पारडी येथील उपक्रमातून अधोरेखित झाले आहे.