हिंगोलीत शिंदेच्या शिवसेनेची ताकद वाढली; माजी आमदार डॉ. संतोष टारफे यांचा जाहीर प्रवेश

उद्धव सेनेचे जिल्हाप्रमुख गोपू पाटील, जिल्हा परिषद अध्यक्ष गणाजी बेले यांच्यासह अनेकांनी घेतला भगवा

लोकार्थ प्रतिनिधी गोपाल सातपुते

हिंगोली : उद्धव बाळासाहेब ठाकरे गटाचे माजी आमदार डॉ. संतोष टारफे यांनी आपल्या असंख्य पदाधिकारी आणि कार्यकर्त्यांसह आज शिवसेनेत जाहीर प्रवेश केला. या पक्षप्रवेशामुळे हिंगोली जिल्ह्यात शिवसेनेच्या संघटनात्मक ताकदीत वाढ झाल्याचे चित्र निर्माण झाले आहे.

या पक्षप्रवेशावेळी डॉ. संतोष टारफे यांच्यासह उबाठा गटाचे हिंगोली जिल्हाप्रमुख गोपू पाटील, माजी जिल्हा परिषद अध्यक्ष गणाजी बेले, माजी नगराध्यक्ष नंदकिशोर तोष्णीवाल तसेच अनेक माजी जिल्हा परिषद सदस्य, माजी सरपंच, ग्रामपंचायत सदस्य, शाखाप्रमुख, प्रमुख पदाधिकारी आणि शेकडो कार्यकर्त्यांनी शिवसेनेचा भगवा हाती घेतला. कळमनुरीचे आमदार संतोष बांगर यांच्या उपस्थितीत हा पक्षप्रवेश सोहळा पार पडला.

यावेळी उपस्थित नेत्यांनी डॉ. संतोष टारफे आणि त्यांच्या सहकाऱ्यांचे शिवसेनेत स्वागत करून पुढील राजकीय वाटचालीसाठी शुभेच्छा दिल्या. डॉ. टारफे हे हिंगोली जिल्ह्यासह संपूर्ण महाराष्ट्रभरात आदिवासी समाजाचे नेतृत्व करत असून, त्यांच्या माध्यमातून आदिवासी समाजाच्या विकासासाठी आणि सामाजिक उन्नतीसाठी अधिक व्यापक स्वरूपात काम करण्याची संधी उपलब्ध होईल, असा विश्वास यावेळी व्यक्त करण्यात आला.

समाजाच्या विकासासाठी शिवसेना पाठीशी राहणार

“तुम्ही समाजाचे काम करा आणि शिवसेनेचे संघटन मजबूत करण्यासाठी कार्यरत राहा. तुमच्या विकासकामांसाठी तसेच सामाजिक उन्नतीसाठी शिवसेना कायम तुमच्या पाठीशी उभी राहील. तुम्हाला कोणतीही कमतरता भासू दिली जाणार नाही,” अशी ग्वाही यावेळी देण्यात आली.

या पक्षप्रवेश सोहळ्याला आमदार संतोष बांगर, आमदार किशोर आप्पा पाटील, शिवसेना सचिव राम रेपाळे, सातारा जिल्हा संपर्कप्रमुख शरद कणसे यांच्यासह हिंगोली युवा सेनेचे जिल्हाप्रमुख रामभाऊ कदम
शिवसेना सहसंपर्क प्रमुख राजेंद्र शिखरे जिल्ह्यातील शिवसेना पदाधिकारी आणि शिवसैनिक मोठ्या संख्येने उपस्थित होते.

डॉ. संतोष टारफे यांच्यासह विविध स्तरांवरील पदाधिकारी आणि शेकडो कार्यकर्त्यांनी शिवसेनेत प्रवेश केल्याने हिंगोली जिल्ह्यात पक्षाच्या संघटनात्मक विस्ताराला बळ मिळणार असल्याचे राजकीय वर्तुळातून मानले जात आहे.