रॉंग साईडने गाडी चालवणाऱ्यांना ठाणे वाहतूक पोलिसांचा दणका; २ दिवसांत २२ चालकांवर गुन्हे दाखल!
रॉंग साईडने गाडी चालवणाऱ्यांना ठाणे वाहतूक पोलिसांचा दणका; २ दिवसांत २२ चालकांवर गुन्हे दाखल!
वाहतुकीच्या नियमांना केराची टोपली दाखवत विरुद्ध दिशेने (Wrong Side) बेदरकारपणे वाहने चालवणाऱ्या चालकांविरोधात ठाणे वाहतूक पोलिसांनी (Thane Traffic Police) आक्रमक मोहीम उघडली आहे. सलग दुसऱ्या दिवशी पोलिसांनी धडक कारवाई करत नियम मोडणाऱ्या वाहनचालकांचे धाबे दणाणले आहेत.
शिळ-महापे अन् कल्याणफाटा मार्गावर धडक कारवाई
ठाणे वाहतूक पोलिसांनी दिलेल्या माहितीनुसार, शिळ-महापे रोड तसेच डोंबिवली ते कल्याणफाटा या महत्त्वाच्या आणि व्यस्त मार्गांवर गेल्या दोन दिवसांत तब्बल २२ वाहनचालकांवर थेट गुन्हे दाखल करण्यात आले आहेत. यापूर्वीही अशाच प्रकारे नियम मोडणाऱ्या ३० वाहनांवर दंडात्मक व कायदेशीर कारवाई करण्यात आली होती.
वाहतूककोंडी अन् अपघातांना निमंत्रण
सकाळच्या वेळी कामावर जाणाऱ्यांची गर्दी असताना अनेक चालक वेळ वाचवण्यासाठी विरुद्ध दिशेने वाहने घुसवायचे. यामुळे शिळ-महापे आणि डोंबिवली-कल्याणफाटा मार्गावर प्रचंड वाहतूककोंडी होऊन नियमित नियमाने जाणाऱ्या प्रवाशांना नाहक मनस्ताप सहन करावा लागत होता. तसेच यामुळे गंभीर अपघातांचा धोकाही निर्माण होत होता.
जनजागृती करूनही दुर्लक्ष; अखेर थेट गुन्हे दाखल!
पोलिसांनी सुरुवातीला या मार्गांवर जनजागृती करणारे बॅनर लावून चालकांना विरुद्ध दिशेने वाहने न चालवण्याचे आवाहन केले होते. मात्र, तरीही नियमांची पायमल्ली सुरूच राहिल्याने आणि स्थानिक नागरिकांच्या तक्रारी वाढल्याने अखेर पोलिसांनी दंडात्मक कारवाईसोबतच थेट गुन्हे दाखल करण्यास सुरुवात केली आहे.
