एमपीएससीच्या सचिवांची बदली!

लोकार्थ प्रतिनिधी
पुणे : महाराष्ट्र लोकसेवा आयोगाच्या परीक्षेतील पेपरफुटी, गैरव्यवहारांच्या आरोपांच्या पार्श्वभूमीवर एमपीएससीचे सचिव महेंद्र हरपाळकर यांची एमपीएससीच्या सचिव पदावरील प्रतिनियुक्ती संपुष्टात आणण्यात आली आहे. राज्य शासनाचे सहसचिव प्रशांत बडगेरी यांनी या बाबतच्या आदेशाचे पत्र प्रसिद्ध केलं आहे. महेंद्र हरपाळकर यांची महाराष्ट्र लोकसेवा आयोगातील सचिव या पदावर दोन वर्षाच्या कालावधीसाठी प्रतिनियुक्तीने नियुक्ती करण्यात आली होती. सचिवांच्या बदलीच्या मागणीसाठी एमपीएससीच्या विद्यार्थ्यांनी आंदोलन केले होते.
एमपीएससीने घेतलेल्या औषध निरीक्षक परीक्षेत पेपरफुटीचे प्रकरण उघडकीस आले. त्यानंतर एमपीएससीने ती परीक्षा रद्द केली. राज्य सेवेच्या पेपर तपासणीमध्येही गैरप्रकार झाल्याचा आरोप आहे. या अनुषंगाने राज्यभरात एमपीएससी स्पर्धा परीक्षार्थ्यांनी आंदोलने केली. आमदार रोहित पवार यांनी एमपीएससी अध्यक्ष, सचिवांच्या राजीनाम्याची मागणी करत आंदोलन केले. मुख्यमंत्री देवेंद्र फडणवीस यांनी स्पर्धा परीक्षार्थी शिष्टमंडळाबरोबर केलेल्या चर्चेत एमपीएससी सचिवांची बदली करण्याची मागणी मान्य केली होती. या पार्श्वभूमीवर एमपीएससी सचिवांची बदली करण्यात आली आहे.