संत एकनाथ सहकारी साखर कारखान्यासमोर थकीत ऊस बिलासाठी स्वाभिमानी शेतकरी संघटनेने सुरू केलेले उपोषण सुटले….

लोकार्थ रिपोर्ट चंद्रकांत अंबिलवादे

पैठण तालुक्यातील संत एकनाथ सहकारी साखर कारखाना चालविणारे सचिन घायळ शुगर लिमिटेड प्रायव्हेट कंपनीने मागील हंगामातील ऊस उत्पादकाच्या उसाचे बिल न दिल्यामुळे कारखान्यासमोर स्वाभिमानी शेतकरी संघटनेच्या माध्यमातून शेतकऱ्यांनी गुरुवार पासून सुरू केलेले आमरण उपोषण अखेर साखर सहसंचालक जाधवर यांनी उसाचे बिल दि.7 ऑक्टोबरच्या आत ऊस उत्पादकाच्या खात्यावर जमा करण्याची लेखी हमीपत्र दिल्यानंतर हे उपोषण दुसऱ्या दिवशी सोडण्यात आले आहे.
उसाची थकीत रक्कम मिळवण्यासाठी गेल्या अनेक दिवसापासून ऊस उत्पादकाने स्वाभिमानी शेतकरी संघटनेच्या माध्यमातून आंदोलन करून देखील संत एकनाथ सहकारी साखर कारखाना करार पद्धतीवर चालविणारे सचिन घायळ शुगर प्रायव्हेट लिमिटेड या कंपनीने थकीत रक्कम देण्यास टाळाटाळी केल्यामुळे गुरुवारी रोजी ऊस उत्पादकांनी कारखान्याच्या प्रवेशद्वारा समोर आमरण उपोषणाचा मार्ग अवलंबला होता. उपोषणाकडे दुर्लक्ष होत असल्याने संतप्त झालेल्या उपोषणकर्त्यांनी कारखान्याचे कामकाज काही काळ बंद पाडले होते. अखेर साखर सहसंचालक जाधवर यांनी मध्यस्थी करून सदरील ऊस उत्पादकाचे थकीत उसाचे बिल दि.7 ऑक्टोबर पर्यंत विना विलंब बँक खात्यावर जमा करण्याची लेखी हमीपत्र दिल्यानंतर हे उपोषण दुसऱ्या दिवशी सोडण्यात आले. कारखान्याचे चेअरमन गणेश घायळ, संचालक मोरे, अमोल घायाळ हे यावेळी उपस्थित होते. या उपोषणात स्वाभिमानी शेतकरी संघटनेचे जिल्हाध्यक्ष ज्ञानदेव मुळे, छावा क्रांतिवीर सेनेचे प्रदेश सरचिटणीस अनिल पाटील राऊत, साईनाथ कर्डिले, पवन शिसोदे, विष्णू बोडखे, सुभाष नवथर, ज्ञानेश्वर उगले, सतीश म्हस्के, बबन गिरगे, रमेश गजरे, विशाल जाधव इत्यादी उपस्थित होते…