केंद्रस्तरीय क्रीडा व सांस्कृतिक स्पर्धेत रामगव्हाण शाळेचा डंका!

खो-खोच्या तिन्ही गटांत प्रथम क्रमांक; धावणे व गीतगायनातही विद्यार्थ्यांची चमकदार कामगिरी

लोकार्थ प्रतिनिधी अविनाश घोगरे

केंद्र बोंधलापुरी येथील सावित्रीबाई फुले शाळेत आयोजित केंद्रस्तरीय क्रीडा व सांस्कृतिक स्पर्धेत रामगव्हाण शाळेच्या विद्यार्थ्यांनी दमदार कामगिरी करत शाळेच्या यशाची पताका फडकवली. खो-खो, धावणे आणि गीतगायन अशा विविध स्पर्धांमध्ये विद्यार्थ्यांनी उल्लेखनीय कामगिरी करत अव्वल क्रमांक पटकावले. विशेष म्हणजे खो-खोच्या तब्बल तीन गटांत रामगव्हाण शाळेच्या संघांनी प्रथम क्रमांक मिळवत आपला दबदबा निर्माण केला.

खो-खोच्या इयत्ता पहिली ते पाचवी मुले, तसेच इयत्ता सहावी ते आठवी मुले आणि इयत्ता सहावी ते आठवी मुली या तिन्ही गटांत रामगव्हाण शाळेच्या संघांनी प्रथम क्रमांक पटकावला. विद्यार्थ्यांनी सांघिक खेळ, चपळाई आणि उत्कृष्ट समन्वयाच्या जोरावर प्रतिस्पर्धी संघांवर मात करत विजेतेपदाला गवसणी घातली.

वैयक्तिक धावणे स्पर्धेतही रामगव्हाणच्या विद्यार्थ्यांनी आपली छाप पाडली. इयत्ता पहिली ते पाचवी मुले गटात धनराज महादेव मोहिते याने द्वितीय क्रमांक मिळवला, तर इयत्ता सातवी ते आठवी मुली गटात आरती सुरेश साबळे हिने प्रथम क्रमांक पटकावत शाळेच्या शिरपेचात आणखी एक मानाचा तुरा खोवला.

सांस्कृतिक विभागात इयत्ता सातवी ते आठवीच्या गीतगायन स्पर्धेत कल्याणी नारायण इंगोले हिने तृतीय क्रमांक मिळवत शाळेच्या यशात भर घातली. क्रीडा मैदानासोबतच सांस्कृतिक क्षेत्रातही विद्यार्थ्यांनी आपली गुणवत्ता सिद्ध केल्याने शाळेत आनंदाचे वातावरण निर्माण झाले आहे.

विद्यार्थ्यांच्या या घवघवीत यशाबद्दल शालेय व्यवस्थापन समितीचे अध्यक्ष व सर्व सदस्य, शाळेचे मुख्याध्यापक दिलीपकुमार डमाळे सर तसेच शिक्षकवृंद यांनी यशस्वी विद्यार्थ्यांचे आणि त्यांना मार्गदर्शन करणाऱ्या शिक्षकांचे अभिनंदन केले. पुढील स्तरावरील स्पर्धांसाठी विद्यार्थ्यांना शुभेच्छा देण्यात आल्या.