डीएमआयसीतील अवैध मुरूम उत्खननावर बिडकीन पोलिसांचा छापा; चालक अटकेत

विजय देऊळगावकर

छत्रपती संभाजीनगर : डीएमआयसी परिसरात विनापरवाना मुरूम उत्खनन करून त्याची वाहतूक करणाऱ्या टोळीवर बिडकीन पोलिसांनी कारवाई केली. या प्रकरणात हायवा चालकाला अटक करण्यात आली असून, अवैध उत्खननासाठी वापरण्यात आलेला जेसीबी आणि विना क्रमांकाची लाल रंगाची स्विफ्ट कार जप्त करण्यात आली आहे.

२१ सप्टेंबर रोजी बिडकीन पोलिसांचे पथक गस्तीवर असताना बिडकीन-निलजगाव रोडवरील डीएमआयसी परिसरात विना क्रमांकाचा हायवा आढळला. तपासणी केली असता त्यामध्ये सहा ब्रासपेक्षा अधिक मुरूम असल्याचे दिसून आले. चालक प्रसाद गणेश मुळे (२४) याच्याकडे रॉयल्टी व परवानगीबाबत विचारणा केली असता त्याने समाधानकारक माहिती दिली नाही.

चौकशीत हा मुरूम वसीम शेख याच्या जेसीबीच्या सहाय्याने डीएमआयसी परिसरातून विनापरवाना उत्खनन करून हायवामध्ये भरल्याचे समोर आले. दरम्यान, ऋषी गवारे याने विना क्रमांकाची स्विफ्ट कार हायवासमोर आडवी लावून पोलिसांच्या कारवाईत अडथळा निर्माण केला. त्यानंतर हायवा मालक सचिन गवारे याने मुरूम खाली करून हायवा घेऊन पलायन केल्याचे पोलिसांनी सांगितले.

याप्रकरणी बिडकीन पोलिस ठाण्यात गुन्हा दाखल करण्यात आला असून, प्रसाद मुळे याला २२ सप्टेंबर रोजी अटक करण्यात आली. अन्य फरार आरोपींचा शोध सुरू आहे. अवैध उत्खननाचे ठिकाण, उत्खननाचे प्रमाण आणि यामध्ये आणखी कोणाचा सहभाग आहे, याचा तपास पोलिसांकडून सुरू आहे.

ही कारवाई पोलीस अधीक्षक प्रकाश जाधव, अपर पोलीस अधीक्षक प्रशांत स्वामी व उपविभागीय पोलीस अधिकारी सुनील पाटील यांच्या मार्गदर्शनाखाली बिडकीन पोलिसांनी केली.