शेतकऱ्याची 1.58 लाखांची रोकड लंपास; पीक कर्जाची फाईलही चोरट्यांनी नेली!

लोकार्थ प्रतिनिधी चंद्रकांत आंबिलवादे पैठण

पैठण | दि. 9 : दुष्काळाच्या संकटात सापडलेल्या शेतकऱ्याने सोनं गहाण ठेवून बँकेतून घेतलेले 1 लाख 58 हजार रुपये आणि पीक कर्जाची फाईल अज्ञात चोरट्यांनी लंपास केल्याची घटना पैठण शहरात घडली.

वडवळी येथील शेतकरी मनोज बाबुराव नालकर यांनी बँक ऑफ बडोदा शाखेत सोन्याचे दागिने गहाण ठेवून 1 लाख 58 हजार रुपये घेतले होते. बँकेतून रक्कम घेऊन त्यांनी ती मोटारसायकलच्या पिशवीत ठेवली. यावेळी एका तरुणाने पैसे पडल्याचे सांगून त्यांचे लक्ष विचलित केले.

नालकर हे पीक कर्जाची फाईल घेऊन महाराष्ट्र ग्रामीण बँकेकडे जात असताना मोटारसायकलवरून आलेल्या दोघांपैकी एकाने त्यांच्या वाहनावरील पिशवी हिसकावून पलायन केले. पिशवीत रोकड आणि पीक कर्जाची फाईल होती.

घटनेची माहिती मिळताच पैठण पोलिसांनी घटनास्थळी पाहणी केली. पोलीस उपनिरीक्षक प्रमोद यादव यांच्या पथकाकडून तपास सुरू असून, पोलीस निरीक्षक महादेव गोमारे यांच्या मार्गदर्शनाखाली चोरट्यांचा शोध घेतला जात आहे.

दुष्काळाच्या संकटात कर्जासाठी सोनं गहाण ठेवलेल्या शेतकऱ्याचीच रोकड चोरीला गेल्याने परिसरात चिंता व्यक्त होत आहे.