दिल्लीतील खुनाच्या गुन्ह्यातील आरोपी छत्रपती संभाजीनगरात अटकेत

गुन्हे शाखेची कारवाई; आरोपीला दिल्ली पोलिसांच्या ताब्यात दिले

विजय देऊळगावकर

छत्रपती संभाजीनगर : नवी दिल्ली येथील खुनाच्या गुन्ह्यातील फरार आरोपीला छत्रपती संभाजीनगर शहर गुन्हे शाखेने अटक करून दिल्ली पोलिसांच्या ताब्यात दिले. राकेश बिहारीलाल अहिरवार (वय २०) असे आरोपीचे नाव आहे.

दिल्लीतील पोलीस स्टेशन तिलक मार्ग येथे गुन्हा क्रमांक १३७/२०२६ अन्वये भारतीय न्याय संहिता कलम १०३(१) प्रमाणे खुनाचा गुन्हा दाखल आहे. या गुन्ह्यानंतर आरोपी छत्रपती संभाजीनगर येथे आल्याची माहिती पोलिसांना मिळाली.

दिल्ली पोलिसांच्या विशेष पथकाने गुन्हे शाखेचे पोलीस निरीक्षक दीपक ढाके यांच्याशी संपर्क साधून आरोपीचा शोध घेण्याबाबत माहिती दिली. त्यानुसार गुन्हे शाखेच्या पथकाने तांत्रिक विश्लेषण व गोपनीय माहितीच्या आधारे शोध घेतला. आरोपी कर्णपुरा मैदान परिसरात फिरत असल्याचे आढळून आल्यानंतर त्याला ताब्यात घेण्यात आले.

आरोपीला पुढील कारवाईसाठी दिल्ली पोलिसांच्या ताब्यात देण्यात आले.

आरोपी राकेश बिहारीलाल अहिरवार