कन्नडच्या धनगरवाडी येथे नापिकी व कर्जाच्या विवंचनेतून तरुण शेतकऱ्याची आत्महत्या.

५० दिवसांचा पाऊस गायब; पिके करपल्याने टोकाचे पाऊल

कार्तिक राजगुरू – लोकार्थ वार्ताहार

कन्नड तालुक्यातील धनगरवाडी (औराळा) येथील एका ४० वर्षीय तरुण शेतकऱ्याने नापिकी आणि कर्जाच्या विवंचनेतून राहत्या घरी विषारी औषध प्राशन करून आत्महत्या केल्याची दुर्दैवी घटना मंगळवारी (ता. २२) रात्री घडली. रामकृष्ण शंकर वाघचौरे (वय ४०, रा. धनगरवाडी) असे मृत शेतकऱ्याचे नाव आहे.

​याबाबत मिळालेल्या माहितीनुसार, रामकृष्ण वाघचौरे यांची औराळा शिवारात पाच एकर शेती आहे. यंदाच्या खरीप हंगामात त्यांनी शेतात मका, कपाशी आणि तुरीची लागवड केली होती. मात्र, पेरणीनंतर सलग ५० दिवस पावसाने ओढ दिल्याने उभी पिके पूर्णपणे जळून हातातून गेली. शेतातील पिके करपल्यामुळे शेतीसाठी घेतलेले कर्ज कसे फेडायचे आणि मुलांच्या शिक्षणाचा खर्च कसा भागवायचा, या चिंतेत वाघचौरे मागील काही दिवसांपासून होते. ‘आता पाऊस आला तरी पिके हातात येणार नाहीत’, अशी खंत त्यांनी दोन दिवसांपूर्वी कुटुंबाजवळ व्यक्त केली होती. ​दरम्यान, याच विवंचनेतून मंगळवारी रात्री साडेनऊच्या सुमारास रामकृष्ण यांनी राहत्या घरी विषारी औषध प्राशन केले. ही बाब निदर्शनास येताच नातेवाइकांनी त्यांना तातडीने कन्नड येथील ग्रामीण रुग्णालयात उपचारासाठी दाखल केले. मात्र, उपचारादरम्यान रात्री ११ वाजेच्या सुमारास त्यांची प्राणज्योत मावळली. ​ऐन तारुण्यात वाघचौरे यांनी जीवनयात्रा संपवल्याने धगरवाडी व औराळा परिसरात तीव्र हळहळ व्यक्त केली जात आहे. त्यांच्या पश्चात आई, पत्नी, व दोन मुले असा परिवार आहे.