राज्यातील शेतकरी आत्महत्या शून्यावर निश्चित धोरणे हवे : शिवसेना नेते मा आ शंकरअण्णा धोंडगे

हिंगोलीत शिवसेना शेतकरी परिषदेचा पदाधिकारी संवाद व मेळावा संपन्न

लोकार्थ प्रतिनिधी मदन पाटील

राज्यातील शेती आणि शेतकऱ्यांच्या समस्या मोठ्या आहेत. शेतकऱ्यांच्या प्रश्नावर आम्ही काम करीत आहोत. शेतकऱ्यांच्या आत्महत्या हा गंभीर विषय असून, या आत्महत्या शून्यावर आणण्यासाठी राज्य सरकारने निश्चित धोरण राबविले पाहिजे, अशी अपेक्षा शिवसेना शेतकरी परिषदेचे प्रदेशाध्यक्ष माजी आमदार शंकरअण्णा धोंडगे यांनी व्यक्त केली.

येथील शिवाजीराव देशमुख सभागृहात ३ ऑक्टोबर रोजी या परिषदेचा मेळावा पार पडला. त्यानंतर पत्रकारांशी ते बोलत होते. धोंडगे म्हणाले, उपमुख्यमंत्री एकनाथ शिंदे यांचे निर्णय धडाडीचे आहेत. ते शेतकऱ्यांसाठी निश्चित धोरणात्मक निर्णय घेतील. सध्याचा काळ कठीण आहे. एवढ्या गंभीर दुष्काळात सरकारने शेतकऱ्यांना जेवढी मदत केली तेवढी कमी आहे. शेतकऱ्यांना हेक्टरी १ लाख रुपयांची मदत करावी, अशी विनंती उपमुख्यमंत्री एकनाथ शिंदे यांच्याकडे केली असल्याचे त्यांनी सांगितले.

दरम्यान, शिवसेना शेतकरी परिषदेने शेतकऱ्यांचे प्रश्न जाणून घेण्यासाठी मेळावा घेतल्याचे त्यांनी सांगितले. शेतकरी आत्महत्या हा गंभीर प्रश्न असून, शेतकऱ्यांना आर्थिक, सामाजिक स्थैर्य देण्यासाठी नगदी स्वरूपातील मदतीची त्यांना आवश्यकता आहे. शेतकरी आत्महत्या थांबविण्यासाठी कायमस्वरुपी उपाय करण्याची गरज असून, सरकारसोबत थेट संवाद साधता यावा, यासाठी आम्ही सरकारच्या सोबत आहोत. डिसेंबर महिन्यात संघटनेचे अधिवेशन घेतले जाणार आहे, असेही त्यांनी सांगितले. यावेळी शिवसेना जिल्हाप्रमुख तथा आमदार संतोष बांगर माजी आमदार भाऊराव गोरेगावकर, युवा सेना जिल्हाप्रमुख रामभाऊ कदम शिवसेना शेतकरी परिषद प्रदेश उपाध्यक्ष गजानन पाटील गोरेगावकर, दत्ता पवार, जिल्हाध्यक्ष संजय देशमुख, भास्करराव बेंगाळ संजय मंदाडे, सुधीर राठोड बबन गारुळे आदींची उपस्थिती होती.

यावेळी शिवसेना शेतकरी परिषद राज्य संघटक पदी गोविंदराव भवर जामठीकर शिवसेना शेतकरी परिषद हिंगोली जिल्हाअध्यक्षपदी संजय उर्फ भैया देशमुख जिल्हा उपाध्यक्ष पदी आकाश जगताप सेनगाव तालुकाध्यक्ष पदी रामराव बेंगाळ औंढा नागनाथ तालुका अध्यक्ष पदी सुधीर राठोड कळमनुरी तालुकाध्यक्ष पदी संजय मदाडे यांच्यासह अनेकांच्या निवडी देखील करण्यात आल्या.