मुंबई उपनगरीय रेल्वे मार्गावर अपघाती मृत्यूंचे सत्र थांबण्याचे नाव घेत नाहीये. मित्रांसोबत मुंबई फिरण्याचा आनंद लुटण्यासाठी आलेल्या एका १७ वर्षीय तरुणाचा धावत्या लोकल ट्रेनमधून तोल जाऊन खाली पडल्याने अतिशय दुर्दैवी मृत्यू झाला आहे. मोहम्मद फाजील शफीक अंसारी (वय १७) असे अपघातात प्राण गमावलेल्या तरुणाचे नाव आहे.
भिवंडीहून निघाला होता मुंबईच्या प्रवासाला
मिळालेल्या माहितीनुसार, फाजील हा भिवंडीतील बाला कंपाउंड परिसरातील रहिवासी होता. तो आपल्या मित्रांसोबत फिरण्यासाठी घरून निघाला होता. भिवंडीहून कल्याण गाठल्यानंतर त्यांनी मुंबईच्या दिशेने जाणारी लोकल ट्रेन पकडली. प्रवासादरम्यान फाजील आणि त्याचे मित्र लोकलच्या दरवाज्यात उभे होते.
कळवा स्थानकादरम्यान घडला अपघात
लोकल ट्रेन कळवा स्थानकादरम्यान आली असताना, दरवाज्याची हँडल पकडलेला फाजीलचा हात अचानक निसटला. ट्रेनचा वेग जास्त असल्याने त्याचा तोल गेला आणि तो थेट रुळांवर खाली कोसळला. या भीषण अपघातात त्याच्या डोक्याला गंभीर दुखापत झाली.
रुग्णालयात उपचारापूर्वीच घोषित केले मृत
घटनेची माहिती मिळताच रेल्वे संरक्षण दलाच्या (RPF) जवानांनी तातडीने घटनास्थळी धाव घेतली. गंभीर जखमी झालेल्या फाजीलला उपचारासाठी घाटकोपर येथील राजावाडी रुग्णालयात दाखल करण्यात आले; मात्र डॉक्टरांनी तपासून उपचारापूर्वीच त्याला मृत घोषित केले.
