कैकाडी समाजातील महिलांना पारंपरिक दारू व्यवसायातून बाहेर काढून रोजगार देणार

राज्य उत्पादन शुल्क अधीक्षक ज्ञानेश्वरी आहेर यांची माहिती

लोकार्थ प्रतिनिधी राहुल मुळे

जालना शहरातील कैकाडी मोडला येथे पारंपरिक हातभट्टीच्या दारू व्यवसायाला आळा घालून कैकाडी समाजातील महिलांना पर्यायी रोजगार उपलब्ध करून देण्यासाठी बैठक आयोजित करण्यात आली होती. जिल्हा कौशल्य विकास केंद्राच्या माध्यमातून महिलांना नवीन व्यवसायाच्या संधी उपलब्ध करून देण्यात येणार असल्याची माहिती राज्य उत्पादन शुल्क अधीक्षक ज्ञानेश्वरी आहेर यांनी दिली.
कैकाडी समाजातील काही महिलांचा पारंपरिक व्यवसाय हातभट्टीची दारू तयार करण्याशी संबंधित आहे. या व्यवसायातून महिलांना बाहेर काढून त्यांना सन्मानाने उदरनिर्वाह करता यावा, यासाठी पर्यायी रोजगार उपलब्ध करून देण्याचा पुढाकार घेण्यात आला आहे. जिल्हा कौशल्य विकास केंद्राच्या माध्यमातून महिलांना दोरा व इतर विविध वस्तू तयार करण्यासह व्यवसायाच्या संधी उपलब्ध करून देण्याचे नियोजन असल्याचे यावेळी सांगण्यात आले.
या बैठकीला राज्य उत्पादन शुल्क अधीक्षक ज्ञानेश्वरी आहेर, जिल्हा कौशल्य विकास केंद्राचे किंमत साहेब, भाजपचे नगरसेवक अशोक माऊली पवार, विलास अंभोरे, राष्ट्रवादी काँग्रेस शरदचंद्र पवार पक्षाचे युवक शहराध्यक्ष राजेंद्र जाधव, कैकाडी समाजातील सुनील पवार, अंकुश गायकवाड, अंकुश पवार आदी उपस्थित होते.
यावेळी भाजपचे नगरसेवक अशोक माऊली पवार यांनी कैकाडी समाजातील महिलांवर गुन्हे दाखल करू नयेत, अशी मागणी केली. महिलांना केवळ पारंपरिक व्यवसायातून बाहेर काढणे पुरेसे नसून, त्यांना पर्यायी रोजगार, प्रशिक्षण आणि आर्थिक स्वावलंबनासाठी मदत मिळणे आवश्यक असल्याचे मत यावेळी मांडण्यात आले.
पर्यायी रोजगारातून महिलांना स्वावलंबी बनविण्याचा प्रयत्न
पारंपरिक हातभट्टी व्यवसायाला आळा घालताना कैकाडी समाजातील महिलांना रोजगाराच्या मुख्य प्रवाहात आणणे, त्यांना कौशल्य प्रशिक्षण देणे आणि कुटुंबाच्या उदरनिर्वाहासाठी उत्पन्नाचे नवीन साधन उपलब्ध करून देणे, हा या उपक्रमाचा उद्देश आहे. या माध्यमातून महिलांना आर्थिकदृष्ट्या सक्षम करण्यासाठी प्रयत्न करण्यात येणार आहेत.