भरधाव ट्रेलरचा थरार; कारला चिरडून १४ वर्षीय मुलाचा जागीच मृत्यू

आई-वडील गंभीर जखमी; दोन दुचाकीही उडवल्या, चालक फरार

लोकार्थ प्रतिनिधी विजय देऊळगावकर छत्रपती संभाजीनगर

सिल्लोड : पालोद फाट्यावर रस्त्याच्या कडेला उभ्या असलेल्या कारसह दोन दुचाकींना सिमेंट वाहतूक करणाऱ्या भरधाव ट्रेलरने मागून जोरदार धडक दिल्याने १४ वर्षीय मुलाचा जागीच मृत्यू झाला. त्याचे आई-वडील जखमी झाले. हा भीषण अपघात रविवारी (४ ऑक्टोबर) सकाळी साडेआठच्या सुमारास हॉटेलसमोर घडला.

दत्ता शांताराम उघडे (१४, रा. पालोद) असे मृत मुलाचे नाव आहे. त्याचे वडील शांताराम उघडे (४२) आणि आई अनिता उघडे (४०) जखमी झाले आहेत. पेट्रोलपंपावर पेट्रोल भरल्यानंतर उघडे कुटुंबीयांनी कार (एमएच-०४, डीवाय-३२३८) हॉटेलसमोर उभी केली होती. कारमधून बाहेर पडत असतानाच सिल्लोडकडे जाणाऱ्या सिमेंटने भरलेल्या ट्रेलरने (एनएल-०१, एबी-४०६२) कारला आणि जवळ उभ्या दोन दुचाकींना अक्षरशः उडवले.

धडकेचा आवाज होताच नागरिकांनी धाव घेत जखमी दाम्पत्याला सिल्लोडच्या शासकीय रुग्णालयात दाखल केले. दरम्यान, दुचाकी चालक दोघेही हॉटेलमध्ये नाश्ता करत असल्याने बचावले. अपघातानंतर ट्रेलर चालक वाहन घटनास्थळी सोडून पसार झाला. सिल्लोड ग्रामीण पोलिसांनी ट्रेलर ताब्यात घेतला असून पुढील तपास सुरू आहे. दत्ताच्या पार्थिवावर पालोद येथे अंत्यसंस्कार करण्यात आले.