चितेगावात बोअरवेलमधून काळं, दुर्गंधीयुक्त पाणी; ग्रामस्थांचा संताप

कंपनीच्या सांडपाण्यामुळे पाणी दूषित झाल्याचा आरोप; प्रशासनाकडून पाणी नमुने तपासणीची प्रक्रिया सुरू

लोकार्थ प्रतिनिधी चंद्रकांत आंबिलवादे पैठण

पैठण : पैठण तालुक्यातील चितेगाव आणि पंचक्रोशी परिसरात गेल्या दोन महिन्यांपासून काही घरांमधील बोअरवेलमधून काळसर, तेलकट तवंग असलेले आणि दुर्गंधीयुक्त पाणी येत असल्याचा गंभीर आरोप ग्रामस्थांनी केला आहे. त्यामुळे नागरिकांच्या आरोग्याचा प्रश्न ऐरणीवर आला असून, पिण्यासाठी तर दूरच; मात्र घरगुती वापरासाठीही हे पाणी वापरावे की नाही, असा प्रश्न नागरिकांसमोर उभा राहिला आहे.

चितेगाव परिसरात विविध उद्योग आणि व्यवसाय असल्याने परप्रांतीयांसह मराठवाड्यातील अनेक भागांतून आलेले कामगार व मजूर मोठ्या प्रमाणावर वास्तव्यास आहेत. या परिसरातील अनेक कुटुंबे बोअरवेलच्या पाण्यावर अवलंबून आहेत. मात्र गेल्या काही काळापासून या पाण्याचा रंग काळसर झाल्याचे तसेच त्यातून उग्र दुर्गंधी येत असल्याचे ग्रामस्थांचे म्हणणे आहे.

विशेषतः महिला आणि ज्येष्ठ नागरिकांनी या समस्येबाबत चिंता व्यक्त केली आहे. घरातील दैनंदिन वापरासाठीही हे पाणी अयोग्य वाटत असल्याने नागरिकांमध्ये भीतीचे वातावरण आहे.

या दूषित पाण्याचा संबंध सीआयई अॅल्युमिनियम कास्टिंग इंडिया लिमिटेड कंपनीकडून सोडण्यात येणाऱ्या पाण्याशी असल्याचा गंभीर आरोप काही ग्रामस्थांनी केला आहे. मात्र कंपनीच्या सांडपाण्यामुळेच बोअरवेलचे पाणी दूषित झाले आहे का, हे अद्याप अधिकृतरीत्या स्पष्ट झालेले नाही. त्यासाठी पाण्याचे नमुने घेऊन शास्त्रीय आणि प्रयोगशाळा तपासणी होणे आवश्यक आहे.

दरम्यान, स्थानिक ग्रामस्थांनी चितेगाव ग्रामपंचायतीकडे निवेदनाद्वारे तक्रार केली आहे. त्यानंतर ग्रामपंचायतीचे प्रशासक राठोड आणि ग्रामविकास अधिकारी मतसागर यांनी संबंधित कंपनीला नोटीस बजावली असून, प्रदूषण नियंत्रण विभागालाही पत्र देण्यात आले आहे. तसेच आरोग्य विभागामार्फत दूषित पाण्याचे नमुने घेऊन ते तातडीने प्रयोगशाळेत तपासणीसाठी पाठविण्याची व्यवस्था करण्याबाबत कळविण्यात आले आहे.

आता प्रशासनाकडून पाण्याचे नमुने तपासल्यानंतर या काळ्या आणि दुर्गंधीयुक्त पाण्याचे नेमके कारण काय, हे स्पष्ट होण्याची अपेक्षा आहे. नागरिकांच्या आरोग्याशी संबंधित हा गंभीर प्रश्न असल्याने प्रशासन या प्रकरणात कोणती पुढील कारवाई करते, याकडे चितेगाव पंचक्रोशीतील नागरिकांचे लक्ष लागले आहे.

पाणी दूषित होण्यामागे नेमकं कारण काय? कंपनीचा सांडपाण्याशी संबंध आहे का? प्रयोगशाळेच्या तपासणीतून या प्रश्नांची उत्तरं मिळणार का, हे पाहणे महत्त्वाचे ठरणार आहे.